ވަކި ޝަރުތުތަކެއް ހަމަވާ ބިދޭސީންނަށް މާސް ލީގަލައިޒޭޝަން ޕްރޮގްރާމްގެ ދަށުން ލީގަލައިޒްވުމުގެ ފުރުސަތު އަންނަ ޖެނުއަރީ މަހުގެ ފުރަތަމަ ދުވަހުން ފެށިގެން އޭޕްރީލް މަހުގެ ދެވަނަ ދުވަހާ ހަމައަށް ހުޅުވާލާނެ ކަމަށް ހޯމް މިނިސްޓްރީން ހާމަކޮށްފިއެވެ.
އޮޕަރޭޝަން ކުރަނގީގެ ދަށުން ހިންގާ މި ޕްރޮގްރާމަކީ ރާއްޖޭގައި ވަޒީފާ އަދާކުރާ ބިދޭސީންގެ ތެރެއިން ހުއްދައެއް ނެތި، ނުވަތަ ހުއްދައިގެ މުއްދަތު ހަމަވެފައިވާ ބިދޭސީން އަދި ކާކުކަން އަންގައިދޭ ސައްހަ ލިޔުމެއް ނެތި އުޅޭ ބިދޭސީންނަށް އަމާޒުކޮށްގެން ހިންގާ ޕްރޮގްރާމެކެވެ.
މި ޕްރޮގްރާމްގެ ދަށުން ލީގަލައިޒްވުމަށްޓަކައި ވޯކް ޕާމިޓްގެ މުއްދަތު ހަމަވެފައިވުން، ބްލެކްލިސްޓްކޮށްފައިވާ ބިދޭސީއެއް ކަމުގައި ނުވުން، ރާއްޖޭގައި މިވަގުތު ހުރުން އަދި ވަޒީފާ އަދާކުރުމުގެ ހުއްދައެއްގެ ދަށުން ރާއްޖެ އެތެރެވެފައިވުން ފަދަ ޝަރުތުތަކެއް ހަމަވާން ޖެހެއެވެ. އެއް ފަހަރު ލީގަލައިޒްވެފައިވާ ބިދޭސީންނަށް މި ފުރުސަތު ނުލިބޭނެއެވެ. އަދި މި މަހުގެ 31 ވަނަ ދުވަހުގެ ކުރިން ވަޒީފާދޭ ފަރާތުން ފިލާފައިވާ ކަމަށް ނުވަތަ ގެއްލިފައިވާ ކަމަށް އެކްސްޕެޓް ސިސްޓަމްގައި ރިޕޯޓްކޮށްފައިވާ ބިދޭސީންނަށް ވެސް މި ފުރުސަތު ނުލިބޭނެއެވެ.
ހޯމް މިނިސްޓްރީން ބުނީ ވަޒީފާ ދޭނެ ފަރާތެއް ހުރި، ޝަރުތުތައް ހަމަވާ ބިދޭސީން ލީގަލައިޒްކުރުމަށް ހުށަހަޅާނީ އެކްސްޕެޓް ސިސްޓަމް މެދުވެރިކޮށް ވަޒީފާދޭ ފަރާތުން ކަމަށެވެ. ހުށަހެޅުމުގެ ޔޫޒާ ގައިޑް އެކްސްޕެޓް ސިސްޓަމް ހޯމް ޕޭޖަށް އަޕްޑޭޓްކުރާނެ ކަމަށް މިނިސްޓްރީން ހާމަކުރިއެވެ. އިތުރު މައުލޫމާތު ސާފުކުރުމަށްޓަކައި 1485 އަށް ގުޅައިގެން ނުވަތަ [email protected] އަށް އީމެއިލްކޮށްގެން މައުލޫމާތު ލިބޭނެއެވެ.
ކޮމެންޓު ފޮނުވާ