ރައްޔިތުންނާއެކު ބާއްވަމުންގެންދަވާ ބައްދަލުވުންތަކުގެ މައިގަނޑު ބޭނުމަކީ އެބޭފުޅުންގެ ކަންބޮޑުވުންތަކަށް ހައްލު ހޯދައިދިނުންކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ހުޅުމާލޭ ދެވަނަ ފިޔަވަހީގެ ރައްޔިތުންނާއެކު ޞަލާހުއްދީން ސްކޫލުގައި ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، މާލޭގެ އެކި އަވަށްތަކުގެ ރައްޔިތުންނާއެކު ބާއްވާ މި ބައްދަލުވުންތަކުން ރައްޔިތުންގެ ކަންބޮޑުވުންތައް ވީހާވެސް ގާތުން އޮޅުންފިލުވައި، އެކަންކަމަށް ރަނގަޅު ހައްލުތަކެއް ހޯދައިދެއްވުމަށް މަސައްކަތްކުރައްވާނެކަމަށެވެ.
ރައީސް ވިދާޅުވީ، ރައްޔިތުން ފާޅުކުރައްވާ ކޮންމެ ޚިޔާލަކީ އަދި މަޝްވަރާއަކީ ވަރަށް މުހިންމުކަމެއްކަމަށާއި، ހުރިހާ ރައްޔިތުންގެ ކަންބޮޑުވުންތަކަށް ރަނގަޅު ހައްލެއް ގެނެސްދިނުމަކީ މި މަސައްކަތުގެ ބޭނުންކަމަށެވެ.
ރައީސް ގެންދަވަނީ މާލޭގެ އެކި އަވަށްތަކުގެ ރައްޔިތުންނާއެކު ސިލްސިލާ ބައްދަލުވުންތައް ބާއްވަވަމުންނެވެ. މި ބައްދަލުވުންތަކުގައި ރައްޔިތުންނަށް އެބޭފުޅުންގެ ޚިޔާލާއި ކަންބޮޑުވުންތައް ހިއްސާކުރެއްވުމުގެ ފުރުޞަތު ދެއްވައި، ރައްޔިތުންނާއެކު ގިނަ ވަގުތުތަކެއް ހޭދަކުރައްވަމުން ގެންދަވައެވެ. މާލެ ސަރަޙައްދުގައި ވިލިމާލެއާއި މައްޗަންގޮޅީގެ އިތުރުން މާފަންނު، ހެންވޭރު، ގަލޮޅުގެ ރައްޔިތުންނާއި ކުދި އަދި މެދުފަންތީގެ ވިޔަފާރިވެރިންނާވެސް އެމަނިކުފާނު ވަނީ ބައްދަލުކުރައްވާފައެވެ.
ކޮމެންޓު ފޮނުވާ