ކްރިއޭޓިވް އިންޑަސްޓްރީ ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން ވިޔަފާރިވެރިންނަށް ނުހަނުފުރުސަތުތައް ފަހިވަމުންދާކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ. ކުދި އަދި މެދު ފަންތީގެ ވިޔަފާރިވެރިންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވަނީ ދިވެހި އުފެއްދުންތައް އޮންލައިންކޮށް ވިއްކުމުގެ ނިޒާމްތައް ފަހިކުރަމުންދާކަން ހާމަކުރައްވާފައެވެ.
ރައީސް ވިދާޅުވީ ބައިނަލްއަގްވާމީ އޮންލައިން ޕޭމަންޓްތައް ރާއްޖެއިން ކުރެވޭނެ ގޮތަށް މަސައްކަތް ކުރަމުންދާކަމަށާއި، ޕޭޕަލްގެ ޚިދުމަތް މިއަހަރުގެ ޖެނުއަރީ މަހު ރާއްޖޭގައި ލިބެން ފަށާނެކަމަށެވެ. މީގެއިތުރުން ބީއެމްއެލްއިން ތައްޔާރުކުރި ސްވައިޕް ޑިޖިޓަލް ވޮލެޓުގެ ބީޓާ މިމަހުގެ ތެރޭގައި ހުޅުވާލާނެކަމަށް ރައީސް ވިދާޅުވިއެވެ. މިއީ ރާއްޖެއާއި ރާއްޖެއިން ބޭރުގައި ފަސޭހަކަމާއެކު ފައިސާގެ މުއާމަލާތް ކުރެވޭނެ 100 ޕަސެންޓް ދިވެހި އުފެއްދުމެކެވެ.
ރައީސް އިތުރަށް ވިދާޅުވީ އަންނަ އަހަރުގެ ފުރަތަމަ ކުއާޓަރގައި ސްވައިޕް ބޭރުގެ ނެޓްވާރކްތަކާ އިންޓިގްރޭޓް ކުރެވި، އިތުރު ޗާޖުތަކާ ނުލައި ވަގުތުން ފައިސާ ގެނެސް ގެންދެވޭނެކަމަށެވެ. ހަމައެއާއެކު އޯތެންޓިކް މޯލްޑިވްސްގައި ރަޖިސްޓަރީވެފައިވާ ފަރާތްތަކަށް މިހާރު އަލީބާބާ ޑޮޓް ކޮމްގައި ޕްރޮޑަކްޓް ވިއްކޭނެ ގޮތް ވެސް ހަމަޖެހިފައިވާކަމަށް ރައީސް މައުލޫމާތު ދެއްވިއެވެ.
ކޮމެންޓު ފޮނުވާ