ސަރުކާރުގެ ޕްރޮޖެކްޓްތަކުން ލިބެން ޖެހޭ ފައިސާ ނުލިބި ލަސްވާއިރު މީރާއަށް ޓެކްސް ދެއްކުމުގެ ދަތިތައް ކުދި އަދި މެދުފަންތީގެ ވިޔަފާރިވެރިން ފާޅުކުރައްވައިފި އެވެ. ސޯޝަލް ސެންޓަރުގައި ރޭ ބޭއްވި ބައްދަލުވުމުގައި ވިޔަފާރިވެރިން ވަނީ މި މައްސަލައިގައި މީރާއިން ފިޔަވަޅު އަޅާކަން ފާޅުކުރައްވައި ސަރުކާރުން ދޭން އޮތް ފައިސާއިން ޓެކްސް ކަނޑައިދިނުމަށް ގޮވާލައްވައިފަ އެވެ.
މި ޝަކުވާއާ ގުޅޭގޮތުން ރައީސް ޑރ. މުހައްމަދު މުއިއްޒު ވިދާޅުވީ މިހާރު ވެސް އެކަން އަމަލުކުރަމުންދާ ނަމަވެސް، އެއަށްވުރެ ފުޅާކޮށް އަދި ގިނަ ބަޔަކަށް އެފަދަ އުސޫލެއް ގެނެސްދެއްވާނެ ކަމަށެވެ. މީރާ އާއި ފިނޭންސް މިނިސްޓްރީގެ އިދާރާތަކާ ބައްދަލުކޮށްގެން ގާނޫނީ ގޮތުން ބެލުމަށްފަހު އެކަމަށް ރަނގަޅު ހައްލެއް ގެނެސްދެއްވާނެ ކަމުގެ ޔަގީންކަން ރައީސް ދެއްވި އެވެ.
މީގެއިތުރުން ރައީސް ވިދާޅުވީ މި މަހުގެ ނިޔަލަށް ގިނަ ކުންފުނިތަކަކަށް ފައިސާ ދެއްވުމަށް ސަރުކާރުން މަސައްކަތްކުރަމުންދާ ކަމަށާއި ބާކީ އޮތް އަދަދު ވެސް ރޯދަމަހާ ހަމައަށް ސާފުކޮށްދެއްވުމަށް މަސައްކަތްކުރައްވަނީ ކަމަށެވެ. ބައްދަލުވުމުގައި ވިޔަފާރިވެރިން ވަނީ މުދަލު ނެރުން ލަސްވެ ޑެމަރޭޖް ދައްކަންޖެހުމާއި ރާއްޖޭގައި ބިދޭސީން ކުރާ ވިޔަފާރި ގިނަވުމާ ގުޅޭގޮތުން ވެސް ކަންބޮޑުވުންތައް ފާޅުކުރައްވައިފަ އެވެ.
ކޮމެންޓު ފޮނުވާ