ކުދި އަދި މެދުފަންތީގެ ވިޔަފާރިވެރިންނަށް ފަސޭހަ ބަދަލުތަކެއް ގެނައުމުގެ ގޮތުން، މާލޭ ވިޔަފާރި ބަނދަރުން މުދާ ކްލިއަރކުރުމުގެ ޚިދުމަތް 18 ގަޑިއިރުން 24 ގަޑިއިރަށް ބަދަލުކޮށްދެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ. މީގެ އިތުރުން މުދާ އެތެރެކުރުމުގައި ހޭދަވާ ޑެމަރޭޖް ނާރާ ވަގުތު 80 ގަޑިއިރުން 124 ގަޑިއިރަށް އިތުރުކޮށްދެއްވުމާއި، ވިޔަފާރިވެރިންގެ އަމިއްލަ ވެހިކަލް ބަނދަރަށް ވައްދައިގެން މުދާ ކްލިއަރކުރެވޭނެ އިންތިޒާމް ހަމަޖައްސައިދެއްވާނެކަމުގައި އެމަނިކުފާނު ވިދާޅުވިއެވެ.
ސޯޝަލް ސެންޓަރުގައި ކުމެވިންނާއެކު ބޭއްވެވި ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، ސަރުކާރުން ވިޔަފާރިތަކަށް ދޭންޖެހޭ ފައިސާއިން މިމަހު ނިމުމުގެ ކުރިން ވީހާވެސް ގިނަބަޔަކަށް ދޫކުރައްވާ، ރަމަޟާން މަހުގެ ކުރިން ހުރިހާ ފައިސާއެއް ދައްކާ ނިންމަވާނެކަމުގައެވެ. ހުޅުމާލެއިން ވިޔަފާރިވެރިންނަށް ކުޑަ އަގެއްގައި ބިން ކުއްޔަށް ލިބޭނެ އިންތިޒާމް ހަމަޖައްސަވައިދެއްވާނެކަމުގައިވެސް އެމަނިކުފާނު ވިދާޅުވިއެވެ. ބިދޭސީން ގެނައުމުގެ ކޯޓާ ފީއަށް އެންމެ ލުއިގޮތެއް ހަމަޖައްސަވައިދެއްވުމާއި، ސަރުކާރު ހޮސްޕިޓަލް ނޫން ތަނަކުން ޑޮކްޓަރު ދޭ ލިޔުމަކުން އާސަންދަ މެދުވެރިކޮށް އައިނު ނުހެދޭގޮތަށް އޮތުމަށް ޙައްލެއް ހޯއްދަވައިދެއްވާނެކަމުގެ ޔަޤީންކަންވެސް އެމަނިކުފާނު ވިޔަފާރިވެރިންނަށް ދެއްވިއެވެ. ވިޔަފާރިވެރިން ހުށަހެޅުއްވި ހުރިހާ ކަމަކަށްވެސް ގާނޫނާ އެއްގޮތަށް ރަނގަޅު ޙައްލު ހޯއްދަވައި، ރާއްޖޭގެ އިޤްތިޞާދު ކުރިއެރުވުމަށް މަސައްކަތްކުރައްވާނެކަމުގައި ރައީސް ވިދާޅުވިއެވެ.
ކޮމެންޓު ފޮނުވާ