ކުދި އަދި މެދު ފަންތީގެ ވިޔަފާރިވެރިންނާ ރޭ ބޭއްވި ބައްދަލުވުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ވިޔަފާރިވެރިންގެ ކަންބޮޑުވުންތަކަށް ހައްލު ގެނައުމަށް ގާނޫނު ބަދަލުކޮށްގެން ވެސް ކުރެވެން ހުރި ހުރިހާ ކަމެއް ކޮށްދެއްވާނެ ކަމަށެވެ. ސޯޝަލް ސެންޓަރުގައި ބޭއްވި މި ބައްދަލުވުމުގައި ވިޔަފާރިވެރިން ހިއްސާކުރި ކަންބޮޑުވުންތައް ކަނުލާ އަޑުއައްސަވައިފައިވާ ކަމަށާއި، އެ މައްސަލަތަކަށް އެންމެ އެދެވޭ ހައްލު ގެނައުމަށް ގާނޫނީ އިމުގެ ތެރެއިން މަސައްކަތް ކުރައްވާނެ ކަމަށް ރައީސް ވިދާޅުވިއެވެ.
ވިޔަފާރިވެރިން އެންމެ ބޮޑަށް ފާހަގަކުރެއްވި ކަންބޮޑުވުމަކީ ސަރުކާރު ހިއްސާވާ ކުންފުނިތަކުން ލިބެން ޖެހޭ ފައިސާ ނުލިބިގެން ދިމާވާ ދަތިތަކެވެ. އާމްދަނީ ނުލިބޭ ނަމަވެސް ޓެކްސް ދެއްކަން ޖެހޭތީ، ލިބެން ޖެހޭ ފައިސާއާއި ޓެކްސް ލާޖައްސައިދިނުމަށް ވިޔަފާރިވެރިން އެދުނެވެ. މި ކަންބޮޑުވުމަށް އިޝާރާތްކުރައްވަމުން ރައީސް ވިދާޅުވީ މީރާ އާއި ފިނޭންސް މިނިސްޓްރީއާ ގުޅިގެން މި ކަމުގައި ގާނޫނީ ގޮތުން ކުރެވެން ހުރި ކަންކަން ބަލައި އެންމެ ރަނގަޅު ހައްލު ގެނެސްދެއްވާނެ ކަމަށެވެ. މި މަސް ނިމުމުގެ ކުރިން ގިނަ ވިޔަފާރިތަކަކަށް ފައިސާ ދޫކުރެވޭނެ ކަމަށާއި، ރޯދަ މަހާ ހަމައަށް ދާއިރު ހުރިހާ ބިލެއް ކްލިއަރ ކުރެވޭނެ ކަމަށް ރައީސް ވިދާޅުވިއެވެ.
ރައީސް ވަނީ ކޯޓާ ފީއަށް ލުއިދިނުމާއި، ވިޔަފާރިތަކުގެ ބޭނުމަށް ގެންނަ ވެހިކަލްތަކުގެ މައްސަލަތަކާއި، އެއާޕޯޓާއި ސީޕޯޓުގައި މުދާ ބެހެއްޓުމަށް ދެވޭ ވަގުތު އިތުރުކުރުމާއި، މުދާ ކްލިއާކުރުމުގެ ހިދުމަތް 24 ގަޑިއިރަށް ހަމަޖެއްސުމާއި، ގުދަން ކުއްޔަށް ހޯދުމުގައި ދިމާވާ ދަތިތަކަށް ހައްލު ހޯދައިދެއްވާނެ ކަމުގެ ޔަގީންކަން ދެއްވައިފައެވެ.
ކޮމެންޓު ފޮނުވާ