ކުރިން އެއް ކޮޓަރީގެ ފުލެޓު ލިބިފައިވާ ފަރާތްތަކަށްވެސް ދެން ހުޅުވާލާ ބޯހިޔާވަހިކަމުގެ ސްކީމުން ފުލެޓަށް އެދޭނެ ގޮތަށް އުސޫލަށް ބަދަލު ގެނެސްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ގަލޮޅުގެ ރައްޔިތުންނާ ބައްދަލުކުރައްވަމުން ރައީސް ވިދާޅުވީ ރައްޔިތުންނާ ގާތުން ބައްދަލުވެ އެފަރާތްތަކުން ބޭނުންވާ ކަންކަމަށް ވީ އެންމެ ފުރިހަމައަށް އިޖާބަދެއްވުމަކީ އެމަނިކުފާނުގެ މަގްސަދު ކަމަށެވެ. މާލޭގެ ގިނަ އަވަށްތަކަށް ކުރެއްވި ދަތުރުތަކުގައި ރައްޔިތުން ހުށަހަޅުއްވި ބިނާކުރަނިވި ހިޔާލުތަކަށް ރިއާޔަތްކޮށް މި ނިންމުން ނިންމެވި ކަމަށް އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ އާ ސްކީމުން ފުލެޓަށް އެދޭނަމަ އެއް ކޮޓަރީގެ ފުލެޓުގައި އުޅެމުން ދާ ފަރާތްތަކުން އެ ފުލެޓު ދޫކޮށްލަން ޖެހޭނެ ކަމަށެވެ. މީގެ އިތުރުން ރައްޔިތުން ހިއްސާކުރެއްވި މަސާޖް ޕާލަރުތަކުގެ ކަންބޮޑުވުމާއި ގުޅިގެން އިމިގްރޭޝަނާއި ފުލުހުން ހާއްސަ ފޯކަސްއެއް ދީގެން މިހާތަނަށް 52 މަސާޖް ޕާލަރެއް ބަންދުކޮށްފައިވާ ކަމަށާއި އޭގެ ތެރެއިން 28 ތަނެއް އަމިއްލައަށް ބަންދުކުރި ކަމަށް ރައީސް ވިދާޅުވިއެވެ. ރައީސް ވިދާޅުވީ ކުޑަ ދުވަސްކޮޅެއްގެ ތެރޭގައި ރައްޔިތުންގެ ހިޔާލާއެކު ކުރެވެމުންދާ މަސައްކަތްތަކުގެ ނަތީޖާ ވަރަށް ރަނގަޅު ކަމަށެވެ.
ކޮމެންޓު ފޮނުވާ