މިދިޔަ ހަފްތާއެއްގެ ތެރޭގައި 52 މަސާޖު ޕާލާ ބަންދުކުރެވިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު ރައިސް މިހެން ވިދާޅުވީ ގަލޮޅު ދާއިރާގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ. މި މަސައްކަތަކީ ރައްޔިތުންގެ ޚިޔާލަށް އިޖާބަދެއްވައި، ނުރަނގަޅު ވިޔަފާރިތައް ހުއްޓުވުމަށް ސަރުކާރުން ފެށި މަސައްކަތެއްކަމަށް ރައީސް ވިދާޅުވިއެވެ.
ރައީސް މުޢިއްޒު ވިދާޅުވި ގޮތުގައި، މި މަސައްކަތް މިމަހުގެ 9 ވަނަ ދުވަހު އިތުރު ވަޞީލަތްތަކާއެކު ޚާއްސަ އޮޕަރޭޝަނެއްގެ ގޮތުގައި ފެށުނެވެ. މި އޮޕަރޭޝަންގެ ތެރެއިން 24 ތަން ވަނީ ސީދާ ބަންދުކުރެވިފައެވެ. އަދި ކަމާ ބެހޭ ފަރާތްތައް ގުޅިގެން މި އޮޕަރޭޝަން ކުރިއަށްގެންދަން ފެށުމާއެކު، އަމިއްލަ އަށް އެ ވިޔަފާރި ކުރަމުންދިޔަ ފަރާތްތަކުން 28 ތަން ބަންދުކުރިކަމަށް ރައީސް ހާމަކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ ކުޑަ ދުވަސްކޮޅެއްގެ ތެރޭގައި މިހާ ފާމްކޮށް މި މަސައްކަތް ފެށުމުން އޭގެ ނަތީޖާ ވަރަށް ރަނގަޅުކަމަށެވެ. "އިތުރު ވަޞީލަތްތަކާއެކު މިކަމަށް ޚާއްސަ މަސައްކަތެއް މިމަހުގެ 9 ވަނަ ދުވަހު ފެށި. މިއަދާހަމައަށް އައިރު 52 މަސާޖްޕާލާ ބަންދުވެއްޖެ. ކުޑަ ދުވަސްކޮޅުގެ ތެރޭގައި މިހާ ފާމްކޮށް މި މަސައްކަތް ރައްޔިތުން ދެއްވި ޚިޔާލާއެކު ކުރަން ފެށީމާ އޭގެނ ނަތީޖާ ރަނގަޅު. މިކަން ކޮންޓިނިއު ކުރާނެ. ރެޔާ ދުވާލު." ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވިއެވެ.
މީގެ އިތުރުން ރައީސް ވިދާޅުވީ އެފަދަ ތަންތަން ބަލާ ފާސްކުރުމުގެ ތެރޭގައި ނުގަވާއިދުން ތިބޭ ބިދޭސީން ފޮނުވާލުމުގެ މަސައްކަތް ވެސް ކުރަމުންދާކަމަށެވެ. އެގޮތުން 10 ވަރަކަށް މީހުން ހައްޔަރުކޮށްފައިވާކަމަށާއި، އޮންނަ އުޞޫލުން އެމީހުން ޑީޕޯޓު ކުރުމުގެ މަސައްކަތް ކުރިއަށްދާނެކަމަށް ރައީސް ޑރ. މުޢިއްޒު ވިދާޅުވިއެވެ. މި މަސައްކަތް ރެޔާއި ދުވާލު ކުރިއަށް ގެންދިއުމަށް ސަރުކާރުން ނިންމަވާފައިވާކަމަށް އެމަނިކުފާނު އިތުރަށް ވިދާޅުވިއެވެ.
ކޮމެންޓު ފޮނުވާ