އޮސްޓްރޭލިއާއިން ބުދަ ދުވަހުގެ މެދުރޭ ފެށިގެން ސޯޅަ އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކޮށް، ދުނިޔޭގެ ތާރީޚުގައި މިފަދަ ގާނޫނު ތަންފީޒުކުރި ފުރަތަމަ ގައުމަކަށް ވެއްޖެއެވެ. މި ގާނޫނުގެ ދަށުން ޓިކްޓޮކް، އިންސްޓަގްރާމް، ފޭސްބުކް އަދި ޔޫޓިއުބް ފަދަ މަޝްހޫރު ޕްލެޓްފޯމްތަކަށް 16 އަހަރުން ދަށުގެ ފަސް މިލިއަން ކުދިންނަށް ވަނުމުގެ ދޮރު ވަނީ ބަންދުކޮށްފައެވެ. އެ ގައުމުން ބުނާ ގޮތުގައި މިއީ ކުޑަކުދިން އިންޓަނެޓްގެ ނުރައްކަލުން ރައްކާތެރިކުރުމަށް އެޅި ތާރީޚީ ފިޔަވަޅެކެވެ.
މި ގާނޫނަށް ޢަމަލުނުކުރާ ޓެކްނޮލޮޖީ ކުންފުނިތަކަށް 49.5 މިލިއަން އޮސްޓްރޭލިއަން ޑޮލަރާ ހަމައަށް ޖޫރިމަނާކުރެވޭނެކަމަށް ކަނޑައަޅާފައިވެއެވެ. ގާނޫނު ތަންފީޒުކުރަން ޕްލެޓްފޯމްތަކުން އުމުރު ކަށަވަރުކުރުމުގެ އާ ނިޒާމްތައް ތަޢާރަފުކޮށްފައިވާއިރު، އީލޯން މަސްކްގެ އެކްސް ފިޔަވައި ހުރިހާ ޕްލެޓްފޯމްތަކުން މި ގާނޫނަށް ތަބާވާނެކަން ހާމަކޮށްފައިވެއެވެ. ބެލެނިވެރިންނާއި ކުޑަކުދިންގެ ޙައްޤުތަކަށް ވަކާލާތުކުރާ ފަރާތްތަކުން މި ފިޔަވަޅަށް މަރުޙަބާ ކިޔާފައިވާއިރު، ބޮޑެތި ޓެކްނޮލޮޖީ ކުންފުނިތަކާއި މިނިވަން ވާހަކަދެއްކުމުގެ ހައްޤަށް ވަކާލާތުކުރާ ފަރާތްތަކުން މިކަމަށް ފާޑުކިޔާފައިވެއެވެ.
އޮސްޓްރޭލިއާގެ މި ފިޔަވަޅު ތަންފީޒު ކުރާ ގޮތް ދުނިޔޭގެ އެހެން ގައުމުތަކުން ވަރަށް ގާތުން ބަލަމުންދާއިރު، ބައެއް ގައުމުތަކުން ވެސް މިފަދަ ފިޔަވަޅުތައް އެޅުމަށް ވިސްނަމުންދާކަމަށް ރިޕޯޓްތައް ބުނެއެވެ.
ކޮމެންޓު ފޮނުވާ