މާލޭގައި ހުންނަ ސެލޫނެއްގައި ހަމަނުޖެހުން ހިންގައި މާރާމާރީ ހިންގި މައްސަލައެއްގައި ފުލުހަކު ހައްޔަރުކޮށްފި އެވެ. މި މައްސަލައިގައި ހައްޔަރުކޮށްފައިވަނީ ސ. ހިތަދޫ އަސަރީވިލާގެ އަލީ މަނިކު، 43 އަހަރެވެ.
ފުލުހުން ވިދާޅުވީ މިމަހުގެ 5 ވަނަ ދުވަހު މާލޭގެ ސެލޫނަކަށް މީހަކު ވަދެ އެތަނުގައި ހަމަނުޖެހުން ހިންގައި ތަކެތީގައި ގެއްލުން ދީ އެތަނުގެ މުވައްޒަފަކާ މާރާމާރީކުރި މައްސަލަ ރިޕޯޓްކޮށްފައިވާ ކަމަށެވެ. މި މައްސަލަ ބަލަން ސީނަށް ދިޔަ ފުލުހަކާ ހައްޔަރުކޮށްފައިވާ މީހާ ކުރިމަތިލައި މާރާމާރީ ހިންގައި ފުލުހުންގެ ދައުރު އަދާކުރުމަށް ހުރަސްއަޅާފައިވާ ކަމަށް ވެސް ފުލުހުން ވިދާޅުވެފައި ވެއެވެ.
އޭނާގެ މައްޗަށް ތުހުމަތު ކުރެވުނު މި ޖިނާއީ މައްސަލާގައި ހައްޔަރުކުރުމާ ގުޅިގެން ޑިސެންބަރު 6 ވަނަ ދުވަހުން ފެށިގެން އޭނާ މުސާރަ ނުލިބޭގޮތަށް ސަސްޕެންޑްކޮށްފައިވާ ކަމަށް ފުލުހުން ހާމަކުރި އެވެ. މައްސަލަ ތަހުގީގުކުރަމުން ދާއިރު އިދާރީ ފިޔަވަޅު އެޅުމަށްޓަކައި ކުރަންޖެހޭ މަސައްކަތް ޕްރޮފެޝަނަލް ސްޓޭންޑަޑްސް ކޮމާންޑުން ކުރަމުން ދާކަމަށް ވެސް ފާހަގަކުރި އެވެ.
ހައްޔަރުކުރި މީހާ ކޯޓަށް ހާޒިރުކުރުމުން 5 ދުވަހުގެ މުއްދަތަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ވިދާޅުވިއެވެ.
ކޮމެންޓު ފޮނުވާ