މާދަމާއަށްފަހު ބަޔޯމެޓްރިކްސް މައުލޫމާތު ނުދޭ ހުރިހާ ބިދޭސީން ވަގުތުން ޑިޕޯޓްކުރާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ސަރުކާރުގެ ދެ އަހަރު ފާހަގަކުރުމަށް މިރޭ އާޓިފިޝަލް ބީޗްގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖެއަށް ދިމާވެފައިވާ ތިން ބޮޑު މައްސަލައިގެ ތެރޭގައި ބިދޭސީންގެ މައްސަލަ ހިމެނޭ ކަމަށާއި މި މައްސަލަ ކޮންމެ ސަރުކާރެއްގައި ވެސް ބޮޑުވަމުން ދިޔަ ކަމަށެވެ. މި ސަރުކާރުން މިދިޔަ އަހަރުގެ ޖުލައި މަހު "އޮޕަރޭޝަން ކުރަނގި" ނަމުގައި ފެށި ބަޔޯމެޓްރިކްސް އޮޕަރޭޝަންގައި މިހާތަނަށް 191،723 ބިދޭސީންގެ މައުލޫމާތު ނަގާފައިވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ މާދަމާއަކީ ބަޔޯމެޓްރިކްސް މައުލޫމާތު ދީފައި ރަޖިސްޓްރީވުމުގެ ފަހު ދުވަހަށް ވާއިރު، އެ ތާރީހަށްފަހު މައުލޫމާތު ނުދޭ ބިދޭސީއަކު ފެނިއްޖެނަމަ ވަގުތުން ޑިޕޯޓްކުރާނެ ކަމަށެވެ. އެކަހަލަ މީހަކު ފެނިއްޖެނަމަ ރައްޔިތުން ފުލުހުންނާއި އިމިގްރޭޝަނަށް އެންގުމަށް އެމަނިކުފާނު ވަނީ ގޮވާލައްވާފައެވެ. މި ވެރިކަމުގައި މިހާތަނަށް 9،021 ބިދޭސީން ޑިޕޯޓްކޮށްފައިވާ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ