ހުޅުދެލި ދުނބުޅި ބަދިގެ އެންމެ ޒަމާނީ އިންޖީނުގެއަކަށް

ދ.ހުޅުދެލީގައި ހުރި "ދުނބުޅި ބަދިގެ" އެންމެ ޒަމާނީ ފެންވަރަށް ތަރައްޤީ ކުރުމަށް ފަށާފައިވަ މަޝްރޫގެ ބޮޑުބައި ނިންމާލައިފި އެވެ.

ހުޅުދެލީގައި މިދިޔަ އަހަރުގެ އޮކްޓޯބަރު މަހުގެ ތެރޭގައި އަމަލީ މަސައްކަތް ފެށި އިންޖީނުގޭގެ މަސައްކަތުގެ ބޮޑުބައިނިމި މިހާރު ތައްޔާރުވަމުންދަނީ ހުޅުވުމަށެވެ. ފެނަކައިން ހާމަކޮށްފައިވާ ގޮތުގައި މިމަސައްކަތުގެ %89 މިހާރުވަނީ ނިމިފައެވެ. މިމަޝްރޫޢުގެ އެންމެ ބޮޑު ބޭނުމަކީ އާންމު ރައްޔިތުންނާއި ދުރުގައި އިންޖީނުގެ ބިނާކޮށް އެންމެ ޒަމާނީ ފެންވަރުގެ ހިދުމަތް ދިނުމެވެ.

ފެނަކައިން މިހާރު 47 އިންޖީނުގެއެއް އަލަށް އިމާރާތްކުރުމުގެ މަސައްކަތް ކުރަމުންދާއިރު، އަލަށް އިމާރާތްކުރާ ބައެއް އިންޖީނުގެތަކަކީ، ރައްޔިތުންނަށް އިންޖީނުގެތަކުން އުނދަގޫތައް ނުފޯރާނެހެން އެކަށީގެންވާ ސަރަހައްދެއްގައި އިމާރަތްކުރާ އިންޖީނުގެތަކެވެ.

ގޮންޖެހުންތައް ހުރިހަމަވެސް ފެނަކައގެ އަމާޒަކީ، ދަތިނުވެ 25 އަހަރަށް ވުރެ ގިނަ ދުވަހަށް ބޭނުން ކުރެވޭނެ މިންވަރަށް ޒަމާނީ ފެންވަރުގެ އިންޖީނުގެތައް ބިނާކޮށް ކަރަންޓް ނެޓްވޯކްތައް ބަދަލުކޮށް 2021 ވަނަ އަހަރު އެކުންފުނީގެ ހުރިހާ އިންޖީނުގެތަކެއް އެންމެ މިޒަމާނާއި އެއްގޮތަށް ބަދަލު ކުރުމެވެ.

ފެނަކައިން ވަނީ ދާދިފަހުން ސެންޓްރަލް ސްކާޑާ ސިސްޓަމެއް ޤާއިމުކޮށް، ރަށްރަށުގެ އިންޖީނުގެތަކުގެ ޙާލަތު މޮނިޓަރކުރެވޭނެ އިންތިޒާމްވެސް ހަމަޖައްސައިފަ އެވެ. ސްކާޑާ ސިސްޓަމް ނުވަތަ ސުޕަވައިޒަރީ ކޮންޓްރޯލް އެންޑް ޑޭޓާ އެކުއިޒިޝަން ސިސްޓަމާއި 26 ރަށެއްގެ އިންޖީނުގެތައް މިހާރު ގުޅާލެވިފައިވާކަމަށް ފެނަކައިން ބުނެއެވެ.