ހދ. ހަނިމާދޫ އިންޓަނޭޝަނަލް އެއާޕޯޓް ޒަމާނީ ފެންވަރަށް ތަރައްގީކޮށް މިރޭ ރަސްމީކޮށް ހުޅުވައިލުމާއެކު، ރާއްޖޭގެ އުތުރުގެ ތަރައްގީއަށް ދޮރެއް ހުޅުވިއްޖެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އިންޑިއާގެ ލައިން އޮފް ކްރެޑިޓްގެ އެހީގައި ހަނިމާދޫގައި މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މި އެއާޕޯޓަކީ ދިވެހި ވިޔަފާރިވެރިންނަށާއި ބޭރުގެ އިންވެސްޓަރުންނަށް ވެސް އުތުރުގައި ވިޔަފާރި ފުޅާކޮށް، ތަރައްގީގެ މަޝްރޫއުތައް ފެށުމުގެ ރަނުގެ ފުރުސަތެއް ކަމަށެވެ. މި އެއާޕޯޓުގެ ސަބަބުން އުތުރުގެ ޓޫރިޒަމް ދާއިރާއާއެކު އެހެނިހެން ދާއިރާތަކަށް ވެސް ބޮޑެތި ކުރިއެރުންތަކެއް ލިބޭނެ ކަމަށް ރައީސް ފާހަގަކުރެއްވިއެވެ.
އިންޑިއާގެ އެގްޒިމް ބޭންކުން 136 މިލިއަން ޑޮލަރު ހަރަދުކޮށްގެން ކުރިއަށްގެންދިޔަ މި މަޝްރޫއުގެ ދަށުން 2.7 ކިލޯމީޓަރުގެ ރަންވޭއެއް އަލަށް ގާއިމުކޮށް، އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ ޓާމިނަލެއް އިމާރާތްކޮށްފައިވެއެވެ. މި އެއާޕޯޓުން އެއާބަސް އޭ320 އާއި ބޯއިން 737 ފަދަ ބޮޑެތި ބޯޓުތަކަށް ހިދުމަތް ދެވޭނެއެވެ.
ރައީސް ވިދާޅުވީ، އުތުރު އިންޓަގްރޭޓަޑް ޑިވެލޮޕްމަންޓް ޒޯންގެ ގޮތުގައި ތަރައްގީކުރުމުގައި ހަނިމާދޫ އެއާޕޯޓަކީ އެންމެ މުހިންމު ވަސީލަތް ކަމަށާއި، މިއަދު ހާސިލުވެގެންދަނީ އުތުރުގެ ދެމެހެއްޓެނިވި ތަރައްގީއަށް ލިބޭ މުހިންމު ކާމިޔާބީއެއް ކަމަށެވެ. 2019 ވަނަ އަހަރު ސޮއިކުރި ކްރެޑިޓް ލައިންގެ ދަށުން 2023 ޖެނުއަރީގައި ފަށާފައިވާ މި މަޝްރޫއު ނިންމާލުމާއެކު، އުތުރު ސަރަހައްދުގެ ތަރައްގީއަށް އާ ބާބެއް ފެށިގެންދާނެއެވެ.
ކޮމެންޓު ފޮނުވާ