ނަސްރުގެ ދުވަހާއި ގުޅިގެން ޖުމްހޫރީ މައިދާނުގައި ބޭއްވި އަސްކަރީ ހުށަހެޅުމުގައި ވާހަކަދައްކަވަމުން ޗީފް އޮފް ޑިފެންސް ފޯސް މޭޖަ ޖެނެރަލް އިބްރާހިމް ހިލްމީ ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ސިފައިންގެ މަތިވެރި ގުރުބާނީގެ އަގުވަޒަންކުރައްވާ ލީޑަރެއް ކަމަށެވެ.
ހިލްމީ ފާހަގަކުރެއްވި ގޮތުގައި 1988 ވަނަ އަހަރުގެ ނޮވެމްބަރު 3 ވަނަ ދުވަހު ދިވެހި ސިފައިން ކޮށްފައިވަނީ މަތިވެރި ޖިހާދެއް ކަމަށާއި އެ ޖިހާދަކީ ދުވަހަކުވެސް ފަނޑުވެގެން ނުދާނެ ދީނީ އަދި ގައުމީ އަގުބޮޑު ހިދުމަތެއް ކަމަށެވެ. ފާއިތުވި އަހަރުތަކުގައި އާދައިގެ ގޮތެއްގައި ފާހަގަކުރަމުން އައި ނަސްރުގެ ދުވަސް ރައީސް މުއިއްޒު ބަދަލުކޮށްލައްވައި މި ދުވަސް ރާއްޖޭގައި އެންމެ ފާހަގަކުރެވޭ ދުވަހަކަށް ހައްދަވާފައިވާ ކަމަށްވެސް ހިލްމީ ވިދާޅުވި އެވެ.
އެމަނިކުފާނަކީ ޤައުމުގެ މިނިވަންކަން ދިފާޢުކުރުމަށްޓަކައި ޝަހީދުވި ފަރާތްތަކުގެ އަގުވަޒަންކުރައްވާ ލީޑަރެއް ކަމަށާއި ރާއްޖޭގެ މިނިވަންކަން ދިފާއުކުރެވޭނެ ގާބިލުކަން ދިވެހި އަސްކަރިއްޔާއަށް ހޯއްދަވައިދެއްވަމުން ގެންދަވާ ކަމަށް ސީޑީއެފް ވިދާޅުވި އެވެ. ހިލްމީ ފާހަގަކުރެއްވި ގޮތުގައި ނޮވެމްބަރު 3 ގެ ހާދިސާއިން ލިބޭ އެއް ފިލާވަޅަކީ މިނިވަންކަން ދިފާއުކުރުމަށް އަބަދުވެސް ތައްޔާރަށް އޮންނަ އަސްކަރީ ގޮތުން ޤާބިލު ފައުޖެއް އޮތުމުގެ މުހިއްމުކަމެވެ. ރައީސް މުއިއްޒު ގެންދަވަނީ އަސްކަރިއްޔާއަށް މީގެކުރިން ގެނެސްފައިނުވާ ފަދަ ތަރައްޤީއާއި ކުރިއެރުން ގެނެސްދެއްވަމުން ކަމަށްވެސް ހިލްމީ ވިދާޅުވި އެވެ.
ކޮމެންޓު ފޮނުވާ