މިދިޔަ ބުރާސްފަތި ދުވަހު އަޑިއަށް ދިޔަ ނަސްރު ބޯޓުން ސަލާމަތް ކުރެވުނު މަދު އަދަދެއްގެ ތަކެތި ހދ. ނޭކުރެންދޫ އަށް ގެންގޮސްފައިވާއިރު، ބޯޓުގައި އެކި ރަށްރަށުގެ ވިޔަފާރިވެރިންނާއި ރައްޔިތުން އެރުވި 2.5 ނުވަތަ 3 މިލިޔަން ރުފިޔާގެ މުދާ ވަނީ ގެއްލިފައެވެ.
ކ. ކާށިދޫއާއި ޅ. އަތޮޅާ ދެމެދުގެ ސަރަހައްދުގައި އަޑިއަށް ދިޔަ މި ބޯޓުގައި ތިބި ފަސް މީހުން (ދެ ދިވެހިންނާއި ތިން ބިދޭސީން) ސިފައިންގެ އެހީތެރިކަމާއެކު ސަލާމަތްކުރެވުނެވެ. ނަމަވެސް ސަލާމަތް ކުރެވުނީ ބައިސްކަލާއި ލަކުޑި ފިލާ، ގޭސްފުޅި، ހަން ފަދަ މަދު އަދަދެއްގެ މުދަލެކެވެ. ނޭކުރެންދޫ، ކުމުންދޫ، ކުރިނބީ އަދި ވައިކަރަދޫ ރައްޔިތުންގެ ތަކެތި އެރަށަށް ގެންގޮސްފައިވާކަން ނޭކުރެންދޫ ކައުންސިލުން ހާމަކުރެއްޖެއެވެ.
ގެއްލުމުގެ ތެރޭގައި 800،000 ރުފިޔާއަށްވުރެ މަތީގެ 6 ސައިކަލާއި، ކާޑު، ގޭސް އަދި އެހެނިހެން ވިޔަފާރި މުދާ ހިމެނެއެވެ. ހަމައެކަނި ކުރިނބީގެ ފިހާރަތަކަށް 400،000 އިން 700،000 ރުފިޔާއާ ދެމެދުގެ ގެއްލުމެއް ވެފައިވާކަން ފާހަގަކުރެވެއެވެ.
ހދ. އަތޮޅު ކައުންސިލްގެ ނައިބު ރައީސް އަބްދުﷲ އަސްލަމް ވިދާޅުވީ މިއީ ބޯޓުގެ ވެރިފަރާތަށާއި ވިޔަފާރިވެރިންނަށާއި ރައްޔިތުންނަށް ލިބުނު ބޮޑު ގެއްލުމެއް ކަމަށާއި މާލީ ގެއްލުމުގެ އިތުރުން ނަފްސާނީ ގެއްލުންވެސް ލިބިފައިވާ ކަމަށެވެ.
ކައުންސިލްތަކުން އަންނަނީ ގެއްލުން ލިބުނު ފަރާތްތަކުގެ މަޢުލޫމާތު އެއްކުރަމުންނެވެ. ކުމުންދޫ ކައުންސިލުން އޮންލައިން ފޯމެއް މެދުވެރިކޮށް މަޢުލޫމާތު ހޯދަމުން އަންނައިރު، މި މަޢުލޫމާތު އެންޑީއެމްއޭ އާ ހިއްސާކުރުމަށްފަހު ގެއްލުމުގެ ބަދަލު ހަމަޖެއްސުމުގެ މަސައްކަތް އެ އިދާރާއިން ކުރިއަށް ގެންދާނެ ކަމަށް ބުނެފައިވެއެވެ. ނޭކުރެންދޫ ކައުންސިލުން ބުނެފައިވަނީ ރައްޔިތުންނަށް ބޭނުންވާ ކާޑާއި ޒަރޫރީ ތަކެތި ހުސްވިޔަ ނުދިނުމަށް ވިޔަފާރިވެރިންނާ ގުޅިގެން މަސައްކަތްކުރަމުންދާ ކަމަށެވެ.
ކޮމެންޓު ފޮނުވާ