ށ. މިލަންދޫގައި އެއާޕޯޓެއް ހެދުމަކީ އެ ރަށު ރައްޔިތުންނަށް ވެވަޑައިގެންނެވި އެންމެ ބޮޑު ވައުދު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. އެ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މިލަންދޫ ރައްޔިތުންނާ ބައްދަލުކުރައްވައި ރައީސް ވިދާޅުވީ އިގްތިސޯދީ ގޮތުންނާއި އެނޫން ގޮތްގޮތުން ބެލިޔަސް އެ އަތޮޅަށް އެއާޕޯޓެއް ހެދުމަކީ މުހިންމު ކަމެއް ކަމަށެވެ. އެއާޕޯޓު ހެދުމަށް ބިން ހަމަޖައްސާފައިވަނީ ރަށުގެ ދުރު ރާސްތާއާއި މެދު ރާސްތާއަށް ބޭނުން ކުރެވޭނެ ގޮތަށް ކަމަށް އެ މަނިކުފާނު ފާހަގަކުރެއްވިއެވެ.
މިލަންދޫ އެއާޕޯޓާއި ބަނދަރު ހެދުމުގެ އެއްބަސްވުންތަކުގައި މިއަދު ސޮއިކުރައްވާފައިވާއިރު، ރައީސް ވިދާޅުވީ ދެ މަޝްރޫއުގެ މަސައްކަތްވެސް 30 މަސް ދުވަހުގެ ތެރޭގައި ނިންމާލާނެ ކަމަށެވެ. އެމްއޭސީއެލްއާ އެކު ސޮއިކުރެވުނު އެއްބަސްވުމުގައި 40 ހެކްޓަރުގެ ބިން ހިއްކުމާއި ބަނދަރު ބަދަލުކުރުމާއި އެއާޕޯޓު ހެދުމުގެ ހުރިހާ މަސައްކަތެއް ހިމެނޭ ކަމަށް ރައީސް ވިދާޅުވިއެވެ. ބިން ހިއްކުމުގެ މަސައްކަތް މިއަދުން ފެށިގެން އަށްމަސް ދުވަހުގެ ތެރޭގައި ނިންމާލެވޭނެ ކަމަށާއި އެއާޕޯޓު މަސައްކަތް އެއްވެސް މަޑުޖެހުމެއްނެތި ކުރިއަށްދާނެ ކަމަށް އެ މަނިކުފާނު ވިދާޅުވިއެވެ.
މީގެ އިތުރުން 700 މީހުންގެ ޖާގައިގެ އިސްލާމީ މަރުކަޒެއްގެ މަސައްކަތް މިއަދު ފަށާފައިވާ ކަމަށާއި 30 އެނދުގެ ހޮސްޕިޓަލެއް އަދި ހަތަރު ބުރީގެ ފުލުހުންގެ އިމާރާތެއް ހެދުމުގެ މަސައްކަތްވެސް ފަށައިފައިވާ ކަމަށް ރައީސް ހާމަކުރެއްވިއެވެ. މިއަދު މިލަންދޫގައި ޕާސްޕޯޓު ހިދުމަތް ފަށާފައިވާއިރު، 1،200 މީހުންގެ ޖާގައިގެ އިންޑޯ ސްޕޯޓްސް ކޮމްޕްލެކްސެއް ހެދުމަށާއި 50 ހައުސިން ޔުނިޓް ހެދުމަށްވެސް އިސްކަންދޭނެ ކަމަށް އެ މަނިކުފާނު ވިދާޅުވިއެވެ. މިއަންނަ އަހަރުގެ ތެރޭގައި ވެމްކޯގެ ހިދުމަތް ފަށާނެކަމަށާއި ޕަބްލިކް ވޯކްސް މަރުކަޒެއް ހަދައިދޭނެކަމަށްވެސް ރައީސް ވިދާޅުވެފައިވެއެވެ.
ކޮމެންޓު ފޮނުވާ