ހދ. ހަންޏާމީދޫގައި ޑޮލަރު އޭޓީއެމެއް ޤާއިމްކުރާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހަންޏާމީދޫގެ ރައްޔިތުންނާ ބައްދަލުކުރެއްވުމަށް އެ ރަށަށް ކުރެއްވި ދަތުރުފުޅުގައި ވާހަކަފުޅު ދައްކަވަމުން ރައީސް ވިދާޅުވީ ލޯކަލް ޓޫރިޒަމުގައި ކުރިޔަށްދާ ގިނަ ރަށްތަކުގައި މިއަންނަ އަހަރު މާރޗް މަހާ ހަމަޔަށް ޑޮލަރު އޭޓީއެމް ގާއިމުކުރުމުގެ މަސައްކަތް ކުރިޔަށް ގެންދަވާނެ ކަމަށެވެ. ޑޮލަރު އޭޓީއެމް ބެހެއްޓުމަށް ހަމަޖެހިފައިވާ ރަށްތައް ކަނޑައަޅާނީ ފަތުރުވެރިކަމުގެ ދާއިރާގައި އެންމެ އެނދު ގިނަ އަދި ކުރިޔަށް އޮތްތަނުގައި އެނދު އިތުރުވާން އޮތް ރަށްތަކުގެ މައްޗަށް ބިނާކޮށް ކަމަށް އެމަނިކުފާނު ވިދާޅުވިއެވެ. މި މަޢުލޫމާތު ނަގާނީ ފަތުރުވެރިކަމާ ބެހޭ ވުޒާރާ މެދުވެރިކޮށް ކަމަށާއި، އޭޓީއެމް ނެތް އާބަން ސެންޓަރުތަކާއި ސިޓީތައް ވެސް މި ލިސްޓުގައި ހިމެނޭނެ ކަމަށް އެމަނިކުފާނު ވިދާޅުވިއެވެ.
ރައީސް ވަނީ ހަންޏާމީދޫގެ ތަރައްޤީއަށް ބޭނުންވާ ގިނަ ކަންތައްތަކެއް ހުރި ކަމަށް ފާހަގަކުރައްވައި، މިއަހަރު ޢަމަލީ މަސައްކަތް ނުފެށި ހުރި މަޝްރޫޢުތަކުގެ މަސައްކަތް އަންނަ އަހަރު ފައްޓަވައިދެއްވާނެ ކަމުގެ ޔަޤީންކަން ރައްޔިތުންނަށް ދެއްވާފައެވެ. އަދި ކުރިއަށް އޮތީ ތަރައްޤީގެ މަޝްރޫޢުތައް އަންނާނެ ދުވަސްތައް ކަމުގައި ފާހަގަކުރައްވައި، އަދިވެސް އެއްފަހަރު އެ ރަށަށް ވަޑައިގަންނަވާނެ ކަމުގެ ޔަޤީންކަން ވެސް ރައީސް ރައްޔިތުންނަށް ދެއްވިއެވެ.
ކޮމެންޓު ފޮނުވާ