އދ. އަތޮޅަށް ކުރައްވަމުން ގެންދަވާ ދަތުރުފުޅުގައި ހަންޏާމީދޫއަށް ވަޑައިގެން ރައްޔިތުންނާ ބައްދަލުކުރައްވައި ރައީސް ޑރ. މުހައްމަދު މުއިއްޒު ވަނީ އެރަށުގެ ކައިރީގައި އޮންނަ ފަޅުރަށް އުތުރުއަތަފަރު، ހަންޏާމީދޫގެ ބައެއްގެ ގޮތުގައި ހަމަޖައްސަން ނިންމަވައިފައެވެ. ރައީސް ވިދާޅުވީ އެރަށް ހަވާލުކުރުމަށް ކުރަންޖެހޭ ގާނޫނީ އިޖުރާއަތްތައް މިހާރު ކުރިޔަށް ދާ ކަމަށާއި، ގަރާރު ދާދި އަވަހަށް ހަމަޖައްސައި ނެރޭނެ ކަމުގެ ޔަގީންކަން ރައްޔިތުންނަށް އަރުވާ ކަމަށެވެ.
ހަންޏާމީދޫއަކީ ލޯކަލް ޓޫރިޒަމްގެ ދާއިރާގައި ކުރިއަރަމުން އަންނަ ރަށެއް ކަމަށް ރައީސް ފާހަގަކުރައްވައި، އެ ދާއިރާ އިތުރަށް ކުރިއެރުވުމަށް ސަރުކާރުން އުތުރުއަތަފަރު ފަތުރުވެރިކަމަށް ތަރައްގީކުރުމަށް ދެވެން އޮތް ހުރިހާ އެއްބާރުލުމެއް ދެއްވާނެ ކަމަށް ވަނީ ވިދާޅުވެފައެވެ. އެ އަތޮޅުގެ ރަށްތަކަށް ޒިޔާރަތްކުރާ ގެސްޓުން ގޮވައިގެން ދާނެ ތަންތަން މަދުކަމުގެ ހައްލެއްގެ ގޮތުން އަލިކޮއެ ރަށް ފަތުރުވެރިކަމާއި ބެހޭ ވުޒާރާގެ ބެލުމުގެ ދަށުގައި ބާއްވައިގެން ތަރައްގީކޮށް، އެރަށަށް ގެސްޓުން ގޮވައިގެން ދެވޭނެ ގޮތް ހަދައިދޭން ވެސް ރައީސް ވަނީ ނިންމަވައިފައެވެ.
އަލިކޮއެ އަކީ އެއްވެސް ފަރާތަކަށް ހަވާލުކުރާނެ ރަށެއް ނޫންކަމަށާއި، އެ ހިސާބުގެ ހުރިހާ ރަށެއްގެ ރައްޔިތުންގެ ގެސްޓުން ގޮވައިގެން ގޮސް ބޭނުންކުރުމަށްޓަކައި ހާއްސަ ރަށެއްގެ ގޮތުގައި ކަނޑައަޅާނެ ކަމަށް ރައީސް ވިދާޅުވިއެވެ. ހަމައެއާއެކު ހަންޏާމީދޫގެ ގޮނޑުދޮށް ހިމާޔަތްކުރުމާއި، ބޭރު ތޮށިލުމާއި، ވެލިއެޅުމުގެ އިތުރުން ދޯނި އެހެލާ ސަރަހައްދެއް ގާއިމުކޮށްދެއްވާނެ ކަމަށާއި، ރަށްގިރުމުގެ މައްސަލަ ހައްލުކުރުމުގެ މަޝްރޫއުގެ އަމަލީ މަސައްކަތް ދާދި އަވަހަށް ފެށޭނެ ކަމަށް ރައީސް ވަނީ ވިދާޅުވެފައެވެ.
ކޮމެންޓު ފޮނުވާ