ބްރޯޑްކާސްޓަރުންގެ އަޒުމަކަށް ވާންވާނީ އިސްލާމީ އޮނިގަނޑަށް ފެތޭ ފައިދާހުރި ޕްރޮގްރާމްތައް ގެނެސްދިނުން: ރައީސް

ރާއްޖޭގެ ހުރިހާ ބްރޯޑްކާސްޓަރުންގެ މައިގަނޑު އަޒުމަކަށް ވާންވާނީ އިސްލާމީ އޮނިގަނޑަށް ފެތޭ، ދިވެހިވަންތަކަން ދެމެހެއްޓޭ، މުޖުތަމަޢަށް މަންފާބޮޑު މަޢުލޫމާތާއި ޕްރޮގްރާމްތައް އުފައްދައި ރައްޔިތުންނަށް ގެނެސްދިނުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރާއްޖޭގައި ބްރޯޑްކާސްޓިން ދުވަސް މިއަދު ފާހަގަކުރުމުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، ޚަބަރުދިނުމާއި މަޢުލޫމާތު ބެހުމާއި މުނިފޫހިފިލުވުން ހިމެނިގެން ބްރޯޑްކާސްޓިންގެ ދާއިރާއިން ކުރެވޭ ހުރިހާ މަސައްކަތެއް ވެސް އަދާކުރަންވާނީ ވަރަށް ބޮޑު ހީވާގިކަމާއި ޒިންމާދާރުކަމާއެކު ކަމަށެވެ. މި ޚިދުމަތަކީ މުޖުތަމަޢަށް ހާއްސަކަމެއް ލިބިގެންވާ، ވަރަށް މުހިއްމު ޚިދުމަތެއް ކަމަށް އެމަނިކުފާނު ފާހަގަކުރެއްވިއެވެ.

ރާއްޖޭގައި ބްރޯޑްކާސްޓިންގެ ޚިދުމަތް ރަސްމީކޮށް ފެށުނީ ރޭޑިއޯގެ ޚިދުމަތުގެ ގޮތުގައި މިއަދުން 63 އަހަރު ކުރީން، 1962 ވަނަ އަހަރުގެ ޑިސެމްބަރު 29 ވަނަ ދުވަހު ކަމަށް ރެކޯޑްތައް ބުނެއެވެ. ދިވެހިންނަށް ޓީވީގެ ޚިދުމަތް ފުރަތަމަ ފަހަރަށް ލިބުނީ އޭގެ 16 އަހަރު ފަހުން، 1978 ވަނަ އަހަރުގެ މާޗް 29 ވަނަ ދުވަހު އެވެ. ރާއްޖޭގައި ބްރޯޑްކާސްޓިންގެ ދާއިރާ ބޮޑަށް ފުޅާވެގެން ދިއުމުގެ މުހިއްމު ބުރުއަކަށް ވީ، އަމިއްލަ ފަރާތްތަކަށް މި ދާއިރާ ހުޅުވައިލުމެވެ. އެއީ 2006 ވަނަ އަހަރުގައެވެ. އެ ފަހުން ފެށިގެން މިހާރު ވަނީ ގިނަ އަދަދެއްގެ ޓީވީ ޗެނަލްތަކާއި ރޭޑިއޯ ސްޓޭޝަންތައް ރާއްޖޭގައި އުފެދިފައެވެ.