ފިލިޕީންސްގައި މިއަދު ބާރުގަދަ ބިންހެލުމެއް އަތުވެއްޖެއެވެ. މި ބިންހެލުމުގެ ބާރުމިން ވަނީ 7.0 މެގްނިޓިއުޑްގައި ރެކޯޑް ކުރެވިފައެވެ.
އިންޑިއާގެ ނޭޝަނަލް ސެންޓަރ ފޯ ސެއިސްމޮލޮޖީން ހާމަކުރި މަޢުލޫމާތުގައި ބުނެފައިވަނީ މި ބިންހެލުން ހިނގާފައިވަނީ ބިމުގެ 10 ކިލޯމީޓަރުގެ އަޑިން ކަމަށެވެ. ބިންހެލުމުގެ މަރުކަޒު ހުރި ތަން އަދި ވަކި ސަރަހައްދެއްގައި ލިބުނު ގެއްލުމުގެ ތަފްސީލު މިވަގުތު ސާފުވެފައެއް ނުވެއެވެ.
ފިލިޕީންސްއަކީ ޕެސިފިކް "ރިންގް އޮފް ފަޔަރ" ސަރަހައްދުގައި ހިމެނޭ ޤައުމަކަށްވާތީ، އެ ޤައުމަށް ބިންހެލުންތަކާއި ވޮލްކޭނޯތައް ގަދަވުމަކީ އާދައިގެ ކަމެކެވެ. މި ސަރަހައްދުގައި ދުނިޔޭގެ 90 ޕަސެންޓް ބިންހެލުންތައް ހިނގައެވެ.
ބާރުގަދަ ބިންހެލުންތަކުން ސުނާމީ އުފެދުމުގެ ފުރުޞަތު އޮތުމުން، ކަމާބެހޭ އިދާރާތަކުން ވަނީ ސަމާލުކަމާއެކު ހާލަތު މޮނިޓަރ ކުރަމުންނެވެ. މި ބިންހެލުމާ ގުޅިގެން ސުނާމީގެ ނުރައްކަލުގެ އިންޒާރެއް ދީފައިވޭތޯ އަދި ސާފެއް ނުވެއެވެ.
ފިލިޕީންސް ސަރުކާރުގެ ކަމާބެހޭ އިދާރާތަކުން ވަނީ ހާލަތު ވަޒަންކުރަމުން ގެންދާ ކަމަށާއި، އިތުރު މަޢުލޫމާތު ލިބޭ ގޮތުން ރައްޔިތުންނަށް އަންގަމުން ގެންދާނެ ކަމަށް ބުނެފައިވެއެވެ.
ކޮމެންޓު ފޮނުވާ