ބޭންކް އޮފް މޯލްޑިވްސް (ބީއެމްއެލް) އާއި އެމެރިކަން އެކްސްޕްރެސް ގުޅިގެން، ރާއްޖޭގެ ފަތުރުވެރިކަން ޕްރޮމޯޓްކުރުމަށް "އެކްސްޕީރިއަންސް މޯލްޑިވްސް" ގެ ނަމުގައި ޑެސްޓިނޭޝަން ކެމްޕޭނެއް ފަށައިފިއެވެ. ދެ ފަރާތުން ގުޅިގެން މިފަދަ ކެމްޕޭނެއް ބާއްވަނީ މިއީ ހަތަރުވަނަ ފަހަރެވެ.
ދެ އަހަރު ދުވަހުގެ މުއްދަތަށް ކުރިއަށްގެންދާ މި ކެމްޕޭންގައި، އެމެރިކަން އެކްސްޕްރެސް ކާޑުގެ މެންބަރުންނަށް ރާއްޖޭގެ އެކި ރިސޯޓުތަކާއި ލިވްއަބޯޑުތަކުން ޚާއްސަ އޮފަރތަކާއި ޑިސްކައުންޓްތަކެއް ލިބޭނެއެވެ. މީގެ ތެރޭގައި ސްޕާ ޓްރީޓްމަންޓް، ބީޗް ޑައިނިން، މޫދު ކުޅިވަރު ހަރަކާތްތައް، ފްލޯޓިން ބްރޭކްފާސްޓް، ރޫމް އަޕްގްރޭޑް އަދި ލޯކަލް އެޑްވެންޗަރ ފަދަ ތަޖުރިބާތައް ހިމެނެއެވެ.
ފަތުރުވެރިކަމާއި ތިމާވެއްޓާއި ބެހޭ ވުޒާރާ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)، ވިޒިޓް މޯލްޑިވްސް ކޯޕަރޭޝަން (ވީއެމްސީ) އަދި ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެންބީއޭއެމް) އިން މި ކެމްޕޭނަށް ތާއީދުކޮށްފައިވާކަމަށް ބީއެމްއެލްއިން މަޢުލޫމާތު ދީފައިވެއެވެ.
ކެމްޕޭން ފެށުމުގެ ރަސްމިއްޔާތުގައި ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، މި ކެމްޕޭނުގެ ޒަރިއްޔާއިން ރާއްޖެއަށް ޒިޔާރަތްކުރާ އެމެރިކަން އެކްސްޕްރެސް ކާޑު މެންބަރުންނަށް ރާއްޖޭގެ ރީތިކަމާއި ސަގާފަތް ޚާއްސަ އޮފަރތަކާއެކު ތަޖުރިބާކުރެވޭނެކަމަށެވެ. އަދި މިކަމުގެ ސަބަބުން ލަގްޒަރީ ޓޫރިޒަމްގެ މަގުބޫލު މަންޒިލެއްގެ ގޮތުގައި ރާއްޖޭގެ މަޤާމު އިތުރަށް ވަރުގަދަވާނެކަމަށް އޭނާ ފާހަގަކުރެއްވިއެވެ. ކެމްޕޭނުގައި ބައިވެރިވާ މަރޗަންޓުންނާއެކު، ރާއްޖެ ފަތުރުވެރިކަމުގެ މަގުބޫލު މަންޒިލެއްގެ ގޮތުގައި ބައިނަލްއަޤުވާމީ ފެންވަރުގައި މާކެޓްކުރެވިގެންދާނެކަމަށްވެސް އޭނާ ވިދާޅުވިއެވެ.
އެމެރިކަން އެކްސްޕްރެސްގެ ގްލޯބަލް ނެޓްވޯކް ސަރވިސަސް، އޭޝިއާ އެން ސައުތު ޕެސިފިކް ގްރޯތު މާކެޓްސްގެ ވައިސް ޕްރެޒިޑެންޓް އެންޑް ޖެނެރަލް މެނޭޖަރ ދިވްޔާ ޖެއިން ވިދާޅުވީ، ރާއްޖެއަކީ ދުނިޔޭގެ ޓޫރިސްޓުންގެ މެދުގައި ވަރަށް މަގުބޫލު މަންޒިލެއްކަމަށާއި، ބީއެމްއެލްއާއެކު ގާއިމުކޮށްފައިވާ ޕާޓްނަރޝިޕްގެ ޒަރިއްޔާއިން ލަގްޒަރީ މަންޒިލެއްގެ ގޮތުގައި ރާއްޖެ އިތުރަށް އިޝްތިހާރުކުރުމަށް މަސައްކަތްކުރާނެކަމަށެވެ.
އޭނާ އިތުރަށް ވިދާޅުވީ، ވިޒިޓް މޯލްޑިވްސްއާއި ޓޫރިޒަމް ދާއިރާގެ އެހެން ސްޓޭކްހޯލްޑަރުންނާ ގުޅިގެން، ގްލޯބަލް ޓްރެވަލް އިކޯސިސްޓަމަށް ދެމުންދާ ސަޕޯޓު އިތުރަށް ހަރުދަނާކުރަމުންދާކަމަށެވެ. މި ކެމްޕޭނަކީ އެމެރިކަން އެކްސްޕްރެސް ކާޑު މެންބަރުންނަށް ޕްރިމިއަމް އަދި ތަފާތު ތަޖުރިބާތަކެއް ހޯދައިދިނުމާއެކު، ރާއްޖެ ލަގްޒަރީ މަންޒިލެއްގެ ގޮތުގައި އިތުރަށް ޕްރޮމޯޓުކުރެވޭނެ މުހިންމު މަޝްރޫޢެއްކަމަށް އޭނާ ފާހަގަކުރެއްވިއެވެ.
ބީއެމްއެލްއާއި އެމެރިކަން އެކްސްޕްރެސް ގުޅިގެން މީގެ ކުރިން ހިންގި "އެކްސްޕީރިއަންސް މޯލްޑިވްސް" ކެމްޕޭނުތަކުގައި، ކާޑު މެންބަރުންނަށް ޕްރިމިއަމް ޚިދުމަތްތަކާއި، އެކްސްކްލޫސިވް ރޭޓްތަކާއި، ދަތުރު ފުރިހަމަކުރުމަށް ކޮމްޕްލިމެންޓަރީ ޚިދުމަތްތައް ފޯރުކޮށްދީފައިވާކަމަށް ބީއެމްއެލްއިން ހާމަކޮށްފައިވެއެވެ. މި އައު ކެމްޕޭނުގެ ޒަރިއްޔާއިން މިފަދަ ޚިދުމަތްތައް އިތުރަށް ފުޅާކޮށް، ރާއްޖޭގެ ފަތުރުވެރިކަމުގެ ސިނާޢަތަށް އިތުރު ކުރިއެރުމެއް ލިބޭނެކަމަށް އުންމީދުކުރާކަމަށް ބީއެމްއެލްއިން ބުނެފައިވެއެވެ.
ކޮމެންޓު ފޮނުވާ