މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކުންފުނީގެ މެނޭޖިން ޑިރެކްޓަރުގެ މަގާމަށް އދ. މާމިގިލީ ޖަވާހިރުވާދީ، ޑރ. މުހައްމަދު އިބްރާހިމް މިއަދު އައްޔަންކުރައްވައިފި އެވެ. މީގެ އިތުރުން އޭނާ އެ ކުންފުނީގެ ބޯޑު މެމްބަރެއްގެ ގޮތުގައިވެސް އައްޔަންކުރައްވާފައިވެ އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކްސްގައި ކުރި ޕޯސްޓެއްގައި މި މައުލޫމާތު ހާމަކޮށްފައިވާއިރު، ޑރ. މުހައްމަދު އިބްރާހިމްއަކީ ކުރިން ބްރޯޑްކާސްޓިން ކޮމިޝަންގެ ސެކްރެޓަރީ ޖެނެރަލްގެ މަގާމު އަދާކުރެއްވި ތަޖުރިބާކާރު ބޭފުޅެކެވެ.
މި އައްޔަންކުރުން އައީ، އެ ކުންފުނީގެ ފުރަތަމަ މެނޭޖިން ޑިރެކްޓަރު އަހުމަދު ޒަރީރު އެ މަގާމުން އިސްތިއުފާ ދެއްވުމާ ގުޅިގެންނެވެ. ޒަރީރު އިސްތިއުފާ ދެއްވީ މިދިޔަ މަހު ފުޓްބޯޅަ އެސޯސިއޭޝަންގެ ސެކްރެޓަރީ ޖެނެރަލްގެ މަގާމަށް އައްޔަންވުމާ ގުޅިގެންނެވެ.
ރާއްޖޭގެ މަސްވެރިކަން ޕްރޮމޯޓުކޮށް މާކެޓުކުރުމުގެ މަގުސަދުގައި ސަރުކާރުން މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކުންފުނި އުފައްދާފައިވަނީ މިދިޔަ އަހަރުގެ ފެބްރުއަރީ މަހުގައެވެ. މި ކުންފުނިން މަސްވެރިކަމުގެ ސިނާއަތް ކުރިއެރުވުމަށާއި ބައިނަލްއަގުވާމީ ފެންވަރުގައި ރާއްޖޭގެ މަސްވެރިކަން ފާހަގަކޮށްދިނުމުގެ މުހިންމު މަސައްކަތްތަކެއް ކުރިއަށް ގެންދާނެއެވެ.
ކޮމެންޓު ފޮނުވާ