ޤައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަން ސަރވިސަސް ލިމިޓެޑް (އައިއޭއެސްއެލް) އަށް 25 އަހަރަށްފަހު، ފުރަތަމަ ފަހަރަށް އަމިއްލަ އޮފީސް އިމާރާތެއް އެޅުމަށް، މިއަދު ބިންގާ އަޅައިފިއެވެ. މި ޕްރޮޖެކްޓުގެ ބިންގާ އެޅުމުގެ ރަސްމިއްޔާތު މިއަދު ވަނީ ބޭއްވިފައެވެ.
ހާއްސަ ރަސްމިއްޔާތެއްގައި މި އިމާރާތުގެ ބިންގާ އަޅުއްވާދެއްވީ ޓްރާންސްޕޯޓް މިނިސްޓަރު މުހައްމަދު އަމީނާއި، އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބާއި، މާލޭ ވޯޓާ އެންޑް ސުވަރޭޖް ކޮމްޕެނީގެ މެނޭޖިން ޑިރެކްޓަރު އަބްދުލް މަތީން މުހައްމަދާއި، އައިއޭއެސްއެލްގެ މެނޭޖިން ޑިރެކްޓާ އިބްރާހިމް އިލްޔާސް އަދި ޑެޕިއުޓީ މެނޭޖިން ޑިރެކްޓާ އަލީ ސަލީމްއެވެ.
ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ފާހަގަކުރެއްވީ މިއީ ޤައުމީ އެއާލައިންގެ ތާރީޚުގައި މުހިންމު ދުވަހެއް ކަމަށެވެ. މިނިސްޓަރު ވިދާޅުވި ގޮތުގައި، މި އިމާރާތް ނިމުމުން އެއް ފުރާލެއްގެ ދަށުން ކުންފުނީގެ ހުރިހާ ޚިދުމަތްތަކެއް ފޯރުކޮށްދެވޭނެ ކަމަށެވެ.
4745 އަކަފޫޓުގެ ބިމެއްގައި 12 ބުރިއަށް އެޅޭ މި އިމާރާތުގެ މަސައްކަތް ހަވާލުކޮށްފައިވަނީ ޗައިނާގެ ހުނާން ނަންބަރު 6 އިންޖިނިއަރިން ކުންފުންޏާއެވެ. އިމާރާތުގެ ފުރަތަމަ ފަންގިފިލާ ބޭނުންކުރާނީ ޓިކެޓް އޮފީހުގެ ގޮތުގައި ކަމަށާއި، ބޭސްމެންޓުގައި މުވައްޒަފުންގެ ވެހިކަލްތައް ޕާކުކުރުމަށް ޚާއްސަ ޕާކިން އޭރިއާއެއް ހިމެނޭނެ ކަމަށް ކުންފުނިން މަޢުލޫމާތު ދީފައިވެއެވެ.
އައިލެންޑް އޭވިއޭޝަން ސަރވިސަސް ލިމިޓެޑުން ބުނި ގޮތުގައި، މި އިމާރާތުގެ މަސައްކަތް 2025 ވަނަ އަހަރުގެ ޑިސެމްބަރު މަހުގެ ކުރިން ނިންމާލުމަށް އަމާޒު ހިފާފައިވާ ކަމަށެވެ. މި ޕްރޮޖެކްޓް ނިމުމުން ކުންފުނީގެ އޮޕަރޭޝަނަލް ކެޕޭސިޓީ އިތުރުވެ، ޚިދުމަތުގެ ފެންވަރު ރަނގަޅުވާނެ ކަމަށް އުންމީދުކުރެވެއެވެ.
ކޮމެންޓު ފޮނުވާ