ޝަރުއީ ކޯޓުތަކާއި އިދާރާތަކުގައި މަސައްކަތް ކުރާ މުވައްޒަފުންނަށް މޫނު ބުރުގާ އަޅައިގެން މަސައްކަތް ކުރުމުގެ ފުރުޞަތު ހުޅުވާލައިފި އެވެ. މި ބަދަލު ގެނެސްފައިވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ޝަރުއީ ދާއިރާގެ މުވައްޒަފުންގެ ގަވާއިދަށް ގެނައި އިސްލާހަކުންނެވެ.
ޑީޖޭއޭ އިން ނެރެފައިވާ ސާކިއުލާގައި ވިދާޅުވެފައިވާ ގޮތުގައި، ޝަރުއީ ދާއިރާގެ މުވައްޒަފުންގެ ހެދުން އެޅުމާ ބެހޭ ގަވާއިދު އިސްލާހުކޮށް އަލުން އެކުލަވާލާފައިވެ އެވެ. ކުރީގެ ގަވާއިދުގައި ބަޔާންކޮށްފައި އޮތީ، ޝަރުއީ ދާއިރާގެ ހިދުމަތްތަކަކީ ޒިންމާދާރުކަމާއި ޖަވާބުދާރީވުމާއެކު ފޯރުކޮށްދޭންޖެހޭ ހިދުމަތްތަކެއް ކަމަށާއި، ހިދުމަތް ހޯދުމަށް އަންނަ ފަރާތްތަކަށް މުއާމަލާތް ކުރާ މުވައްޒަފަކީ ކާކުކަން އެނގެން އޮންނަންޖެހޭނެ ކަމަށެވެ. އެގޮތުން މަސައްކަތު ވަގުތުގައި މުވައްޒަފުން ހެދުން އަޅަންވާނީ އެމީހެއްގެ އަމިއްލަ ނަން ފެންނާނެ ގޮތަށް ކަމަށް ކުރީގެ ގަވާއިދުގައި ބުނެފައިވެ އެވެ.
އަލަށް ގެނެސްފައިވާ އިސްލާހުގެ ދަށުން، މުވައްޒަފުންނަށް މޫނު ބުރުގާ އަޅައިގެން މަސައްކަތް ކުރުމަށް އެއްވެސް ހުރަހެއް ނޯންނާނެ އެވެ. ނަމަވެސް މަސައްކަތުގެ މާހައުލުގައި އެ މުވައްޒަފެއްގެ އަމިއްލަ ނަން ކަށަވަރު ކުރަން ބޭނުންވެއްޖެ ހާލަތެއްގައި، އެ މުވައްޒަފެއްގެ މޫނު އެ ކޯޓެއް ނުވަތަ އިދާރާއެއްގެ ކަމާބެހޭ އަންހެން މުވައްޒަފަކަށް ދައްކަންޖެހޭނެ ކަމަށް އަލަށް ގެނެސްފައިވާ އިސްލާހުގައި ބަޔާންކޮށްފައިވެ އެވެ.
މި އިސްލާހަކީ ދީނީ އަދި ސަގާފީ އުސޫލުތަކާ އެއްގޮތަށް ޝަރުއީ ދާއިރާގައި މަސައްކަތް ކުރާ އަންހެން މުވައްޒަފުންނަށް ލިބިދޭ މުހިންމު ލުޔެއް ކަމުގައި ފާހަގަކުރެވެ އެވެ. މި ބަދަލާއެކު، މޫނު ބުރުގާ އަޅައިގެން މަސައްކަތް ކުރަން ބޭނުންވާ މުވައްޒަފުންނަށް އެ ފުރުޞަތު ލިބިގެންދާއިރު، ހިދުމަތް ހޯދާ ފަރާތްތަކަށް ވެސް ބޭނުންވެއްޖެ ހިނދެއްގައި މުވައްޒަފުންގެ އަމިއްލަ ނަން ކަށަވަރު ކުރެވޭނެ އިންތިޒާމު ހަމަޖެހިފައި އޮތުމަކީ ދެ ފަރާތަށް ވެސް ފައިދާހުރި ކަމެކެވެ.
ކޮމެންޓު ފޮނުވާ