ކުޅުދުއްފުށީ ސިޓީގައި ސިޓީ ހޮޓަލަކާއި އިސްލާމީ މަރުކަޒެއް ބިނާ ކުރަނީ

ކުޅުދުއްފުށީ ސިޓީގައި ސިޓީ ހޮޓަލަކާއި އިސްލާމީ މަރުކަޒެއް ގާއިމް ކުރުމަށް ހަމަޖެހިފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.

ހދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ކުޅުދުއްފުއްޓަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އިސްލާމީ މަރުކަޒެއް އެޅުމުގެ މަސައްކަތް އަންނަ އަހަރު ފަށާނެ ކަމަށެވެ.

ހަމައެއާއެކު، ކުޅުދުއްފުށީ އެއާޕޯޓާ އިންވެގެން އޮތް ބިމުން އިގުތިސޯދީ ފައިދާ ނެގޭނެ ގޮތް ހެދުމަށް އެ ތަނުގައި ސިޓީ ހޮޓަލެއް ގާއިމް ކުރަން ނިންމާފައިވާ ކަމަށް ރައީސް ވިދާޅުވިއެވެ. އަދި އެކަމަށް ޝައުގުވެރިވާ ފަރާތްތަކަށް ފުރުސަތު ހުޅުވާލާނެ ކަމުގައި ރައީސް ވިދާޅުވިއެވެ.

"އެ ތަނުގައި ސިޓީ ހޮޓަލެއް އެޅިގެން ދިޔައީމަ ވަރަށް ބޮޑު ކުރިއެރުމެއް ލިބޭނެ،" އެ ބިމުގައި އިންވެސްޓްކުރުމުގެ ފުރުސަތު ކައުންސިލުން އިކޮނޮމިކް މިނިސްޓްރީއަށް ފަހިކޮށްދޭހާ އަވަހަކަށް ސިޓީ ހޮޓަލެއް އެޅުމަށް ހުޅުވާލާނެ ކަން ފާހަގަ ކުރައްވައި ރައީސް ވިދާޅުވިއެވެ.

ރޭގެ ޖަލްސާގައި ވަނީ ކުޅުދުއްފުށި ސިޓީގައި ފަށާފައި، މަސައްކަތް ކުރިއަށް ނުގޮސް އޮތް 400 ހައުސިން ޔުނިޓުގެ މަސައްކަތް ކުރިއަށް ގެންގޮސް އިތުރު 2،000 ހައުސިން ޔުނިޓު އެޅުމުގެ އެއްބަސްވުމުގައި ސޮއިކޮށްފައެވެ. އެ އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ހަސަން ރަޝީދުއެވެ. އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ބްރިގޭޑިއާ ޖެނެރަލް ރިޓަޔާޑް އަލީ ޒުހައިރުއެވެ.

އަދި ޓާޝަރީ ފެންވަރަށް ހިދުމަތް ދިނުމަށް ކުޅުދުއްފުށީގައި 10 ބުރީގެ އިމާރާތެއް އަޅަން މި ސަރުކާރުން ވަނީ ނިންމައިފައެވެ. ކުޅުދުއްފުށީ ރީޖަނަލް ހޮސްޕިޓަލް ޓާޝަރީ ފެންވަރަށް އަޕްގްރޭޑްކުރުމަށް ބޭނުންވާ އިމާރާތް ޑިޒައިންކުރުމުގެ މަސައްކަތުގެ އެއްބަސްވުމުގައި ވެސް މި މަހުގެ 21 ވަނަ ދުވަހު ވަނީ ސޮއިކޮށްފައެވެ.