ނޫސްވެރިކަމާއި މީޑިއާތަކަށް ބޮޑެތި ޖޫރިމަނާ ކުރުމުގެ ބާރު މީޑިއާ ކޮމިޝަނަކަށް ދޭ ބިލެއް މަޖިލީހަށް ހުށަހެޅިފައިވާތީ، އެ ބިލު ވަގުތުން އަނބުރާ ގެންދިއުމަށް ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މިއަދު ގޮވާލައްވައިފިއެވެ.
'އެކްސް' ޕްލެޓްފޯމްގައި ކުރެއްވި ޕޯސްޓެއްގައި ކުރީގެ ރައީސް ވިދާޅުވީ، މި ބިލަކީ މިނިވަން ނޫސްވެރިކަމަށް ދެވޭ ނުރައްކާތެރި ހަމަލާއެއް ކަމަށާއި، މީޑިއާތައް ސަރުކާރުގެ ބާރުގެ ދަށަށް ގެނައުމުގެ މަގްސަދުގައި ތައްޔާރުކޮށްފައިވާ ބިލެއް ކަމަށެވެ.
"މީޑިއާތައް އުވާލައި، ވަކިވަކި ނޫސްވެރިންނާ ދެކޮޅަށް ހަރުކަށި ފިޔަވަޅު އެޅޭ ގޮތަށް އޮތް މި ބިލަކީ މިނިވަން ނޫސްވެރިކަން އެއްކޮށް ނައްތާލާނެ ބިލެއް،" ކުރީގެ ރައީސް ސޯލިހް ވިދާޅުވިއެވެ.
ދައުލަތުގެ ތިން ބާރު ފާރަވެރިކޮށް، ޖަވާބުދާރީކުރުވުމުގެ މުހިންމު ދައުރެއް އަދާކުރަމުންދާ މީޑިއާތަކުގެ މިނިވަންކަން ކަށަވަރުކުރުމަކީ ޑިމޮކްރަސީގެ އަސާސެއް ކަމަށް ފާހަގަކުރައްވައި، މި ބިލު ފޯރީ އަނބުރާ ގެންދިއުމަށް ކުރީގެ ރައީސް ގޮވާލެއްވިއެވެ.
މަޖިލީހަށް ހުށަހެޅިފައިވާ މި ބިލު ގާނޫނަކަށްވެއްޖެނަމަ، މިހާރު މަސައްކަތްކުރަމުންދާ މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލެވި، އެ ދެ މުއައްސަސާގެ މަސްއޫލިއްޔަތުތައް "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން" ގެ ނަމުގައި އާ ކޮމިޝަނަކަށް ބަދަލުވާނެއެވެ.
އާ ކޮމިޝަނުގައި ހިމެނޭ ހަތް މެންބަރުންގެ ތެރެއިން ތިން މެންބަރުން ސީދާ އައްޔަންކުރާނީ ރައީސުލްޖުމްހޫރިއްޔާއެވެ. ބާކީ ހަތަރު މެންބަރުން ހޮވާނީ މީޑިއާތަކުން ކުރިމަތިލާ ފަރާތްތަކުގެ މެދުގައި ބާއްވާ އިންތިޚާބަކުންނެވެ. މީގެ އިތުރުން ކޮމިޝަނުގެ ރައީސް ކަނޑައެޅުމުގެ އިޚްތިޔާރު ވެސް ރައީސުލްޖުމްހޫރިއްޔާއަށް ލިބިގެންވެއެވެ.
ބިލުގައި ހިމެނޭ އެހެން މާއްދާއެއްގައި ބުނާ ގޮތުން، މީޑިއާތަކުން އިންތިޚާބުކުރާ މެންބަރުން މަގާމުން ވަކިކުރުމުގެ ބާރު ރައްޔިތުންގެ މަޖިލީހަށް ލިބިދޭކަން ފާހަގަކޮށްލެވެއެވެ.
މި ބިލަކީ ނޫސްވެރިކަމުގެ މިނިވަންކަމާއި، މީޑިއާތަކުގެ މުސްތަގިއްލުކަމަށް ސީދާ ނުރައްކަލެއް ކުރިމަތިކުރުވާ ބިލެއް ކަމަށް ނޫސްވެރިންގެ ޖަމްއިއްޔާތަކުންނާއި މަދަނީ ޖަމްއިއްޔާތަކުން ވެސް ކަންބޮޑުވުން ފާޅުކުރަމުން ދާކަން ފާހަގަކުރެވެއެވެ.
ކޮމެންޓު ފޮނުވާ