ތުރުކީ ސަރުކާރުން ދިވެހިރާއްޖެއަށް ހަދިޔާކުރި "ދަރުމަވަންތަ" ނަމުގެ އަސްކަރީ މަނަވަރު ރަސްމީކޮށް ޙަވާލުކުރެވުމުން ދިވެހި ޤައުމީ ދިފާޢީ ބާރުގެ ތާރީޚުގައި މުހިންމު ދުވަހެއް ފާހަގަކުރެވިގެން ހިނގައްޖެއެވެ.
ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވެފައިވަނީ މި މަނަވަރަކީ ދިވެހި ކޯސްޓްގާޑުގެ ކަނޑުމަތީ ޤާބިލްކަން އެތައް ގުނައެއް އިތުރުކޮށްދޭނެ، މުޅިން ތަފާތު ފެންވަރެއްގެ ނޭވީ އުޅަނދެއް ކަމަށެވެ. މިހާތަނަށް ކޯސްޓްގާޑުގައި ބޭނުންކުރަމުން އައި އުޅަނދުތަކާ އަޅާބަލާއިރު، ހަތިޔާރާއި ފަޔާ ޕަވާގެ ގޮތުން "ދަރުމަވަންތަ" އަކީ ވަރަށް ކުރިއަރާފައިވާ އުޅަނދެއް ކަމަށް އޭނާ ފާހަގަކުރެއްވިއެވެ.
މި އުޅަނދު ރަސްމީކޮށް ހަވާލުކުރުމަށް ރޭ ބޭއްވުނު ރަސްމިއްޔާތުގައި ވާހަކަދައްކަވަމުން ހިލްމީ ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދިވެހި އަސްކަރިއްޔާ ތަރައްޤީކުރުމަށް ދެއްވާފައިވާ ވައުދުފުޅުތައް ފުއްދަވަމުން ގެންދަވާ ކަން މި މަނަވަރު ލިބުމުން ސާބިތުވެގެން ދާކަމަށެވެ. މިއީ އެމްއެންޑީއެފްގެ އަރުމާލަށް އިތުރުވާ އެންމެ ބޮޑު އުޅަނދު ކަމަށްވެސް އޭނާ ވިދާޅުވިއެވެ.
ދިވެހިރާއްޖޭގެ ސިޔާދަތު ހިނގާ 200 ނޯޓިކަލް މޭލުގެ ސަރަޙައްދާއި، އޭގެ ބޭރުގައި ހިމެނޭ ހާއްސަ އިގްތިސާދީ ސަރަޙައްދުގައި ރާއްޖޭގެ މަސްލަޙަތުތައް ޙިމާޔަތްކުރުމުގެ ޤާބިލްކަން މި އުޅަނދުން އިތުރުވެގެންދާނެ ކަމަށް ހިލްމީ ވިދާޅުވިއެވެ. ހާދިސާތަކުގައި އެހީތެރިކަން ފޯރުކޮށްދިނުމާއި، ކަނޑުމަތީގައި ދަތިވާ ފަރާތްތަކަށް އެހީވުމަށް ރާއްޖެއަށް ލާޒިމުކޮށްފައިވާ މެރިޓައިމް ސާޗް އެންޑް ރެސްކިއު ރީޖަންގެ މަސްއޫލިއްޔަތުތައް އަދާކުރުމުގެ ފުރިހަމަ ޤާބިލްކަން މި އުޅަނދުން ލިބިގެންދާނެއެވެ.
ސަރުކާރުން ކުރިއަށް ގެންދަވަނީ ދިވެހި އަސްކަރިއްޔާގެ ޤާބިލްކަން އިތުރުކޮށް، ބައިނަލްއަޤްވާމީ ފެންވަރުގައި ރާއްޖެއަށް މަތިވެފައިވާ ޒިންމާތައް ފުރިހަމަ ގޮތުގައި އަދާކުރެވޭނެ ފެންވަރަށް އަސްކަރިއްޔާ ތަރައްޤީކުރުމުގެ މަސައްކަތް ކަމަށް ހިލްމީ ވިދާޅުވިއެވެ. ކުރިއަށް އޮތް ތަނުގައި އިތުރު އަސްކަރީ ކަނޑުގެ އުޅަނދުތައް ރައީސް މުއިއްޒު އެމްއެންޑީއެފަށް ހޯއްދަވައިދެއްވާނެ ކަމަށްވެސް އޭނާ ފާހަގަކުރެއްވިއެވެ.
"ދަރުމަވަންތަ" ލިބުމަކީ އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމުގައި ބައިނަލްއަޤްވާމީ މުޖުތަމަޢުގެ ޒިންމާދާރު މެންބަރެއްގެ ގޮތުގައި ދިވެހިރާއްޖެއިން އަދާކުރަންޖެހޭ ދައުރު ފުރިހަމަ ގޮތުގައި އަދާކުރުމަށް ދިވެހި ސިފައިން ތައްޔާރުކުރުމުގައި އެޅުނު ވަރަށް މުހިންމު ފިޔަވަޅެކެވެ.
ކޮމެންޓު ފޮނުވާ