ދިވެހިރާއްޖޭގެ ޒަކާތު ހައުސްއިން އިންތިޒާމުކޮށްގެން ބާއްވާ ބައިނަލްއަޤުވާމީ ޒަކާތު މަހާސިންތާ 2025 ގައި ބައިވެރިވުމުގެ ފުރުސަތު އާންމު ފަރުދުންނަށް ހުޅުވާލައިފިއެވެ. މި އަހަރުގެ ޖެނުއަރީ މަހުގެ 23 ވަނަ ދުވަހު ފެށުމަށް ހަމަޖެހިފައިވާ މި މުހިންމު މަހާސިންތާގައި ބައިވެރިވުމަށް ޝައުޤުވެރިވާ ފަރާތްތަކަށް ގޫގުލް ލިންކު މެދުވެރިކޮށް ރަޖިސްޓަރީ ކުރެވޭނެ ކަމަށް ޒަކާތު ހައުސްއިން މަޢުލޫމާތު ދީފައިވެއެވެ.
މި މަހާސިންތާއަކީ ރާއްޖޭގައި ޤާއިމުކުރެވިފައިވާ ޒަކާތުގެ ނިޒާމު ދެމެހެއްޓެނިވި ގޮތެއްގައި ކުރިއެރުވުމަށް ބާއްވާ ކޮންފަރެންސެއް ކަމަށާއި، އިލްމުވެރިންނާއި ޒަކާތުގެ މަސައްކަތުގައި ހަރަކާތްތެރިވާ ފަންނީ ބޭފުޅުންނާއި ސިޔާސަތު ކަނޑައަޅާ ފަރާތްތަކާއި މުޖުތަމަޢުގެ އިސްވެރީން އެއްތަނަކަށް ގެނެސް، ޒަކާތުގެ ނިޒާމު ހަރުދަނާކުރުމަށް ބޭނުންވާ އިސްތިރާޖުތައް ދެނެގަތުމަށް މަގުފަހިވާނެ ކަމަށް ޒަކާތު ހައުސްއިން ފާހަގަކުރެއެވެ.
އިޖްތިމާއީ ދުޅަހެޔޮކަމާއި އިޤްތިސާދީ ހަމަޖެހުން ޤާއިމުކުރުމުގައި ޒަކާތަކީ ވަރަށް މުހިންމު ވަސީލަތެއް ކަމަށާއި، މި ނިޒާމުގެ ހިންގުން އިތުރަށް ހަރުދަނާކޮށް، އޭގެ ފައިދާ މުޖުތަމަޢަށް އިތުރަށް ފޯރުކޮށްދިނުމަށް މަސައްކަތްކުރުމަކީ މި މަހާސިންތާގެ މައިގަނޑު މަޤްޞަދު ކަމަށް ވަނީ ބުނެފައެވެ.
ފާހަގަކޮށްލެވޭ ގޮތުގައި، ދިވެހިރާއްޖޭގައި ފުރަތަމަ ފަހަރަށް ބައިނަލްއަޤުވާމީ ޒަކާތު ކޮންފަރެންސެއް ބޭއްވިފައިވަނީ 2024 ވަނަ އަހަރުގައި ޒަކާތު ހައުސްގެ އިންތިޒާމުގައެވެ. އެ މަހާސިންތާ ކާމިޔާބުވުމާ ގުޅިގެން، މި އަހަރުވެސް އެފަދަ މަހާސިންތާއެއް ބޭއްވުމަށް ނިންމާފައިވާ ކަމަށާއި، މި ފަހަރުގެ މަހާސިންތާގައި އިތުރު ބައިނަލްއަޤުވާމީ ތަޖުރިބާކާރުންނާއި ޚާއްޞަ މެހުމާނުން ބައިވެރިވާނެ ކަމަށް އުންމީދުކުރާ ކަމަށް ޒަކާތު ހައުސްއިން ވަނީ ބުނެފައެވެ.
މަހާސިންތާގައި ބައިވެރިވުމަށް ޝައުޤުވެރިވާ ފަރާތްތަކުން މަޢުލޫމާތު ކަރުދާހާއެކު ތައްޔާރުކުރެވިފައިވާ ގޫގުލް ލިންކު މެދުވެރިކޮށް ވީ އެންމެ އަވަހަކަށް ރަޖިސްޓަރީ ކުރުމަށް ޒަކާތު ހައުސްއިން ވަނީ އިލްތިމާސްކޮށްފައެވެ.
ކޮމެންޓު ފޮނުވާ