ރާއްޖެއަށް ކުރިމަތިވެފައިވާ އެކިއެކި ދަތިތަކާއި ގޮންޖެހުންތަކަށް ހައްލު ހޯދުމަށްޓަކައި ހުރިހާ ފަރާތްތަކެއް އެކުގައި މަސައްކަތްކުރުމުގެ މުހިންމުކަން ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ފާހަގަކުރައްވައިފިއެވެ.
މިއަދު ހުޅުމާލެ ސެންޓްރަލް ޕާކުގައި ބޭއްވި އެމްޑީޕީގެ 20 ވަނަ އަހަރީ ދުވަހުގެ "ރަން ރީނދޫ" ދުވުން ފަށައިގަތުމަށްފަހު ރާއްޖެޓީވީއަށް ދެއްވި ހާއްސަ އިންޓަވިއުއެއްގައި ރައީސް އިބޫ ވިދާޅުވީ، ރާއްޖެއަށް ކުރިމަތިވެފައިވާ މައްސަލަތަކަށް ހައްލު ހޯދުމަށް ޕާޓީގެ މެންބަރުން އާ ރޫހަކާއެކު ތައްޔާރަށް ތިބިކަން ފެނިގެން ދިޔަކަމަށެވެ.
"މިއަދު އަނެއްކާވެސް އަޅުގަނޑުމެންނަށް ފެނިގެން މިދިޔައީ މި ޕާޓީގެ އާންމު މެމްބަރުން ރާއްޖޭގެ މިވަގުތުގެ ހާލަތު އޮތް ގޮތް ވިސްނިގެން، އަނެއްކާވެސް އާ ރޫހަކާ އެކީގައި ނުކުމެ، މިކަންތައްތަކަށް ހައްލު ހޯދަން ތައްޔާރަށް ތިބިތަން" ކަމަށް އެމަނިކުފާނު ވިދާޅުވިއެވެ.
ރާއްޖެއަށް ކުރިމަތިވެފައިވާ ބޮޑެތި ގޮންޖެހުންތަކުގެ ސަބަބަކީ ސަރުކާރުގެ ސިޔާސަތުތައް ކަމަށް ރައީސް އިބޫ ފާހަގަކުރައްވައި، މި ދަތިތަކުން އަރައިގަތުމަށްޓަކައި ހުރިހާ ފަރާތްތަކުން ގުޅިގެން ގިނަގުނަ މަސައްކަތްތަކެއް ކުރަންޖެހޭނެ ކަމަށް ވިދާޅުވިއެވެ.
"ކުރިމަތިވެފައި މި އޮތް ބޮޑެތި މައްސަލަތަކުން ސަލާމަތްވެވޭނީ އެންމެން އެކީގައި އަދި ވަރަށް ގިނަ މަސައްކަތްތަކެއްކޮށްގެން. އެކަންތައްތައް ހައްލު ކުރެވޭނެ އެކަންތައްތަކުން ސަލާމަތްވެވޭނީ އަދިވެސް ވަރަށް ގިނަ މަސައްކަތްތަކެއްކޮށްގެން" ކަމަށް އެމަނިކުފާނު ވިދާޅުވިއެވެ.
އެމްޑީޕީގެ 20 ވަނަ އަހަރީ ދުވަސް ފާހަގަކުރުމަށް ބޭނުންކުރާ "އެކުގައި ގަދަކޮށް" މި ޝިއާރު ފާހަގަކުރަން ފެށީ، ރައީސް މުހައްމަދު ނަޝީދު އެމްޑީޕީން ވަކިވެ ދެ އަހަރު ހޭދަކުރެއްވުމަށްފަހު އަލުން ޕާޓީއާ ގުޅިވަޑައިގެންނެވި ދުވަސްވަރުއެވެ.
ރައީސް ޑރ. މުހައްމަދު މުއިއްޒުގެ ސަރުކާރުގެ ވެރިކަމަށް އެއް އަހަރާއި އަށް މަސްދުވަސް ފުރިހަމަވާއިރު، ރާއްޖޭގެ އިޤްތިޞާދަށް ބޮޑެތި ގޮންޖެހުންތަކެއް ކުރިމަތިވެފައިވެއެވެ. ޑޮލަރުގެ އަގު ކަޅު ބާޒާރުގައި 21 ރުފިޔާއަށް މައްޗަށް ގޮސް، އާންމު ރައްޔިތުން ބޭނުންކުރާ އަސާސީ ތަކެތީގެ އަގު ބޮޑުވެ، ކުދި އަދި މެދު ފަންތީގެ ވިޔަފާރިތަކަށް ނުހަނު ދަތިތަކެއް ކުރިމަތިވެފައިވާކަން ފާހަގަކުރެވެއެވެ.
ކޮމެންޓު ފޮނުވާ