ރާއްޖޭގެ މިނިވަންކަމުގެ 60 ވަނަ އަހަރު ފާހަގަކުރުމަށް ތައްޔާރުވަމުންދާތީ، މިއަދުން ފެށިގެން ބުރާސްފަތި ދުވަހުގެ ނިޔަލަށް ޖުމްހޫރީ މައިދާން ސަރަހައްދުގެ ޓްރެފިކަށް ވަގުތީ ބަދަލުތަކެއް ގެނެސް، ބައެއް ގަޑިތަކުގައި އިއްޒުއްދީން ފާލަން ސަރަހައްދު ބަންދުކުރުމަށް ފުލުހުން ނިންމައިފިއެވެ.
ފުލުހުންގެ މައުލޫމާތުގައިވާ ގޮތުން، މިނިވަން ދުވަހުގެ ރިހާސަލްތައް ކުރިއަށްދާ ވަގުތުތަކުގައި ޓްރެފިކް ފްލޯއަށް ބަދަލު އަންނާނީ ކޮންމެ ދުވަހަކު ހަވީރު 4:00 އިން 6:00 އަށާއި ރޭގަނޑު 8:00 އިން 11:00 އަށެވެ. މި ގަޑިތަކުގައި އިއްޒުއްދީން ފާލަމުގެ ސަރަހައްދަށް ކަނޑު އުޅަނދުފަހަރު ކައިރިކުރުން ވެސް މަނާކުރާނެ ކަމަށް ފުލުހުން ބުނެއެވެ.
މި އިންތިޒާމުތައް ހަމަޖެއްސުމުގެ ކުރިން މިއަދު ހެނދުނުން ފެށިގެން ޖުމްހޫރީ މައިދާން ސަރަހައްދުގެ ބައެއް ހިސާބުތައް ވަނީ ބަންދުކުރެވިފައެވެ. މިއީ މިނިވަން ދުވަހުގެ ބޮޑު ހަރަކާތްތަކަށް ތައްޔާރުވުމުގެ ގޮތުން ކުރިއަށްގެންދާ މަސައްކަތްތަކުގެ ބައެކެވެ.
މި އަހަރު މިނިވަންކަމުގެ 60 ވަނަ އަހަރު ފުރުމާ ގުޅިގެން ޖުލައި 26، 27 އަދި 28 ވަނަ ދުވަހު ޚާއްސަ ހަރަކާތްތަކެއް ކުރިއަށްގެންދިއުމަށް ރާވާފައިވެއެވެ. މި ހަރަކާތްތަކުގެ ތެރޭގައި ޤައުމީ ޖަލްސާތަކާއި، ސަގާފީ ހަރަކާތްތަކާއި، އެކި ޕްރޮގްރާމްތައް ހިމެނެއެވެ.
ފުލުހުން އާންމުންގެ އަރިހުން އެދިފައިވަނީ މި މުއްދަތުގައި ޖުމްހޫރީ މައިދާން ސަރަހައްދުން ދަތުރުކުރާއިރު ވަގުތު އިތުރަށް ނެގުމަށް ތައްޔާރުވެގެން ދަތުރުކުރުމަށާއި، ފުލުހުންގެ އިރުޝާދުތަކަށް އަމަލުކުރުމަށެވެ. ހަމައެއާއެކު ކަނޑު އުޅަނދުފަހަރު ދުއްވާ ފަރާތްތަކުން ވެސް މި މުއްދަތުގައި އިއްޒުއްދީން ފާލަން ސަރަހައްދަށް ކައިރިނުކުރުމަށް ސަމާލުކަން ދިނުމަށް ފުލުހުން އިލްތިމާސްކޮށްފައިވެއެވެ.
ކޮމެންޓު ފޮނުވާ