ރާއްޖޭގައި ސްނޯކްލިންގ ކުރަމުން ދަނިކޮށް ލޯންޗެއްގެ ބުރަފަތީގައި ޖެހި މަރުވި ސިންގަޕޫރުގެ ދަރިވަރު ޖެނާ އެރިއަން ޗަން ޒި-އެންގެ މައްސަލައިގެ ތަހުގީގު ދިވެހި ފުލުހުން ނިންމާލައިފިއެވެ. މި ތަހުގީގުގެ ތެރެއިން ފުލުހުންގެ ޓީމެއް ސިންގަޕޫރަށް ގޮސް، ހާދިސާގައި ބައިވެރިވި ފަރާތްތަކުގެ ބަޔާންތައް ނަގާފައި ވެއެވެ.
ސެއިންޓް ޖޯސެފްސް އިންސްޓިޓިއުޝަން އިންޓަނޭޝަނަލްގެ ދަރިވަރަކު ކަމަށްވާ ޖެނާ މަރުވީ، 2024 ވަނަ އަހަރުގެ ނޮވެމްބަރު 8 ވަނަ ދުވަހު އދ. ދިގުރަށް ސަރަހައްދުގައި ސްނޯކްލިންގ ކުރަމުން އުޅެނިކޮށެވެ. މި ހާދިސާ ހިނގިތާ މަސްތަކެއް ފަހުން، މިއަހަރުގެ މެއި މަހު، ދިވެހި ފުލުހުންގެ އޮފިސަރުން މިއުޗުއަލް ލީގަލް އެސިސްޓެންސް އުސޫލުގެ ދަށުން ސިންގަޕޫރަށް ދަތުރުކޮށް، ކަމާގުޅޭ ބަޔާންތައް ނެގިއެވެ.
ފުލުހުންގެ ބަޔާނުގައި ވިދާޅުވީ، މި މައްސަލާގައި ޕްރޮސެކިއުޓާ ޖެނެރަލް އޮފީހާއި ކަމާބެހޭ އެހެން މުއައްސަސާތަކާ ގުޅިގެން މަސައްކަތް ކުރަމުންދާ ކަމަށާއި، ތަހުގީގު ހާމަކަންބޮޑު ގޮތެއްގައި ކުރިއަށްގެންދާނެ ކަމަށެވެ. އަދި ތަހުގީގުގެ ފައިނަލް ރިޕޯޓު ކަމާބެހޭ ފަރާތްތަކާ ހިއްސާކުރާނެ ކަމަށްވެސް ފުލުހުން ބުނެއެވެ.
ނަމަވެސް ޖެނާގެ އާއިލާއިން ބުނާ ގޮތުގައި، ހާދިސާގެ ފުރިހަމަ ތަފްސީލު އަދިވެސް ލިބިފައެއް ނުވެއެވެ. މައުލޫމާތު ނުލިބޭތީ، އާއިލާއިން "ޖަސްޓިސް ފޯ ޖެނާ" ގެ ނަމުގައި ވެބްސައިޓެއް ހަދައި، އަމިއްލައަށް ތަހުގީގެއް ފަށައިފައިވާ ކަމަށް ސިންގަޕޫރު މީޑިޔާތަކުން ރިޕޯޓް ކޮށްފައި ވެއެވެ.
ސިންގަޕޫރުގެ އެޑިއުކޭޝަން މިނިސްޓްރީން ބުނެފައިވަނީ، ސްކޫލުން ސަލާމަތީ ޕްރޮޓޮކޯލްތަކާ އެއްގޮތަށް އަމަލުކޮށްފައިވާތީ އިތުރު ތަހުގީގެއް ނުކުރާނެ ކަމަށެވެ. ސިންގަޕޫރު ފުލުހުން ރާއްޖޭގެ ފުލުހުންނަށް ތަހުގީގުގައި އެހީތެރިކަން ފޯރުކޮށްދީފައިވީ ނަމަވެސް، ބޭރު ގައުމެއްގައި ހިނގާ ހާދިސާއެއް ސިންގަޕޫރު އޮތޯރިޓީތަކަށް ސީދާ ތަހުގީގު ކުރުމުގެ ބާރު ލިބިގެނެއް ނުވާކަން އެ މިނިސްޓްރީން ފާހަގަކުރިއެވެ.
ކޮމެންޓު ފޮނުވާ