އިރާންގެ ވެރިރަށް ތެހެރާނުގައި ޖޫން މަހުގެ 15 ވަނަ ދުވަހު ބޭއްވުނު ސުޕްރީމް ނެޝަނަލް ސެކިއުރިޓީ ކައުންސިލްގެ ބައްދަލުވުމަށް އިޒްރޭލުން ދިން ވައިގެ ހަމަލާގައި އިރާންގެ ރައީސް މަސްއޫދު ޕެޒޭޝްކިއާންއަށް ކުދިކުދި އަނިޔާތަކެއް ލިބުނު ކަމަށް އިރާންގެ އިސް އޮފިޝަލަކު ބުނެފިއެވެ.
ނަން ހާމަނުކުރުމުގެ ޝަރުޠުގައި އަލްޖަޒީރާއަށް މައުލޫމާތު ދިން އޮފިޝަލް ބުނީ، މި ހަމަލާގެ އަމާޒަކީ ސަރުކާރުގެ ތިން ބާރުގެ އިސްވެރިން ކަމަށާއި، މިއީ ސަރުކާރު ބަޣާވާތްކޮށް ވައްޓާލުމަށް ކުރި މަސައްކަތެއް ކަމަށެވެ. އަދި މި ހަމަލާގެ އަގު އިޒްރޭލުން ދައްކަންޖެހޭނެ ކަމަށް އޭނާ ވިދާޅުވިއެވެ.
މެންދުރުފަހުގެ ކުރީކޮޅު ކުރިއަށް ދިޔަ މި ހަމަލާ ދިން ވަގުތު، ސަރުކާރުގެ އިސްވެރިންނާއި، ޤާނޫނު ހަދާ އަދި އަދުލު އިންސާފު ޤާއިމުކުރާ ބާރުގެ އިސްވެރިންނާއި އެހެނިހެން އިސް އޮފިޝަލުން ބައްދަލު ކުރަމުން ދިޔައެވެ.
އިރާންގެ ސަރުކާރު ނިއުސް އެޖެންސީ ފާސް ނިއުސް އެޖެންސީން ހާމަކުރި ގޮތުގައި، އިޒްރޭލާއެކު 12 ދުވަހުގެ ހަނގުރާމައެއް ކުރިއަށް ދިޔައިރު ދެވުނު މި ހަމަލާގެ ވާހަކަ އެންމެ ފުރަތަމަ އިއުލާނު ކުރީ އިރާނުގެ ރައީސް ހޯމަ ދުވަހު ދެއްވި ބަޔާނެއްގައެވެ.
ތެހެރާންގެ ހުޅަނގުގައި ހުންނަ ސަރުކާރުގެ އިމާރާތެއްގެ ތިރީ ފަންގިފިލާގައި ކުރިއަށް ދިޔަ މި ބައްދަލުވުމަށް ހަމަލާ ދިންއިރު، އިމާރާތުގެ ވަންނަ ދޮރުތަކާއި ނުކުންނަ ދޮރުތަކަށް ހަ މިސައިލް އަމާޒުކުރެވުނެވެ. މިސައިލްތައް އަމާޒުކުރި ބޭނުމަކީ ފިލަންދާ މަގުތައް ބަންދުކޮށް، އިމާރާތުގެ އެތެރޭގައި ވައި ދައުރުވާ ނިޒާމު ކަނޑާލުން ކަމަށް ރިޕޯޓުތައް ބުނެއެވެ.
މިސައިލް ހަމަލާތަކުގެ ސަބަބުން އިމާރާތުގެ ކަރަންޓު ކެނޑިގެން ދިޔަ ނަމަވެސް، އިރާންގެ އޮފިޝަލުންނަށް ކުއްލި ހާލަތުގައި ބޭނުންކުރާ ދޮރަކުން ފިލައިގަތުމަށް ފަހިވިއެވެ. ރައީސް ޕެޒޭޝްކިއާންވެސް މި ފިލި ބަޔަކުގެ ތެރޭގައި ހިމެނިވަޑައިގަތެވެ.
ރައީސް ޕެޒޭޝްކިއާން މި ހަމަލާއިން ސަލާމަތްވި ނަމަވެސް، އެމަނިކުފާނުގެ ފަޔަށް ކޮންމެވެސް ވަރަކަށް އަނިޔާ ލިބިފައިވާ ކަމަށް ރިޕޯޓުތައް ބުނެއެވެ. މި ހާދިސާއަކީ އިރާނާއި އިޒްރޭލާ ދެމެދު ދިގު މުއްދަތެއް ވަންދެން ކުރިއަށް ދާ ދެބަސްވުންތަކުގެ އެންމެ ފަހުގެ ހާދިސާއެވެ.
ކޮމެންޓު ފޮނުވާ