ތިނަދޫ ސިޓީ ފެރީ ޓާރމިނަލް ޖެޓީގައި ލޯންޗެއް ޖެހި، ލޯންޗުގައި ދަތުރުކުރި ހަތަރު މީހަކަށް އަނިޔާވެފައިވާ ކަމަށް ފުލުހުން ހާމަކޮށްފި އެވެ. މި ހާދިސާ ހިނގާފައިވަނީ ހޯމަ ދުވަހުގެ މެންދުރުފަހު، ލޯންޗު ޖެޓީއަށް ކައިރިކުރަން އުޅެނިކޮށް ކޮންޓްރޯލް ގެއްލިގެންނެވެ.
ފުލުހުންގެ މަޢުލޫމާތު ލިބިފައިވާ ގޮތުގައި، އެ ލޯންޗުގައި ދަތުރުކުރީ ހަ މީހުންނެވެ. އޭގެ ތެރޭގައި ތިން އަންހެނުންނާއި، އެއް އަހަރުގެ ކުޑަ ކުއްޖަކާއި، ލޯންޗުގެ ކެޕްޓަނާއި ފަޅުވެރިޔާ ހިމެނެ އެވެ. ނަމަވެސް ހާދިސާގައި އަނިޔާވީ ހަތަރު މީހުންނަށެވެ.
އަނިޔާވި މީހުންގެ ތެރޭގައި ހިމެނެނީ 50 އަހަރުގެ ދިވެހި ކެޕްޓަނަކާއި، 29 އަހަރުގެ ފަޅުވެރިޔަކާއި، 25 އަހަރާއި 28 އަހަރުގެ ދެ ދިވެހި އަންހެނުންނެވެ. މި ހަތަރު މީހުންނަށް ވަނީ ތިނަދޫ އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ފަރުވާ ދެވެން ފަށާފަ އެވެ.
ފަހަކަށް އައިސް ދަތުރުފަތުރުގެ ނުރައްކާތެރި ހާދިސާތައް އިތުރުވަމުން ދާތީ، ދުއްވާ އުޅަނދުފަހަރު ރައްކާތެރިކަމާއެކު ދުއްވުމަށާއި، ޚާއްޞަކޮށް ބަނދަރުތަކާއި ޖެޓީތަކާ ކައިރިވާއިރު ވަރަށް ބޮޑަށް ސަމާލުވުމަށް ފުލުހުން އިލްތިމާސްކުރެ އެވެ. މީގެ އިތުރުން ދަތުރުކުރާއިރު ރައްކާތެރިކަމުގެ ހުރިހާ ފިޔަވަޅުތަކެއް އެޅުމަކީ ވަރަށް މުހިންމު ކަމެއް ކަމުގައި ފުލުހުން ފާހަގަކުރެ އެވެ.
ކޮމެންޓު ފޮނުވާ