މުޅި ރާއްޖެއަށް އުދަ އަރާނެކަމަށް ލަފާކޮށް، މެޓްއިން ހުދު އެލާޓް ނެރެފި

މޫސުމާބެހޭ ޤައުމީ އިދާރާ (މެޓް އޮފީސް) އިން މުޅި ރާއްޖެއަށް އުދަ އަރާފާނެކަމަށް ލަފާކޮށް ހުދު ސަމާލުގެ އެލާޓެއް ނެރެފިއެވެ. މި އެލާޓް ނެރެފައިވަނީ މިއަދު މެންދުރުފަހު 2:00 އިން ހަވީރު 5:00 އާ ދެމެދުގެ ވަގުތަށެވެ.

މެޓް އޮފީހުން ލަފާކޮށްފައިވާ ގޮތުން، ކުރިއަށްއޮތް 24 ގަޑިއިރުގެ ތެރޭގައި ރާއްޖޭގެ އެކި ހިސާބުތަކުގައި ގުގުރުމާއެކު ވާރޭވެހި، ކެރި އުފެދިދާނެއެވެ. އެހެންނަމަވެސް، ކަނޑުތައް މަޑުވާނޭކަމަށް އެ އިދާރާއިން ބުނެއެވެ.

ފާއިތުވި 24 ގަޑިއިރުގެ ތެރޭގައި ރާއްޖޭގެ ގިނަ ރަށްރަށަށް އުދައިގެ އަސަރުކޮށް، އެކި ވަރުގެ ގެއްލުންތައް ލިބިފައިވެއެވެ. ރާއްޖޭގެ ވެރިރަށް މާލެއަށްވެސް އުދައިގެ އަސަރު ފޯރާފައިވާކަން ފާހަގަކުރެވެއެވެ.

މި ހާލަތާ ގުޅިގެން ފުލުހުންގެ ފަރާތުން ފުލުހުން އިއްޔެ އިލްތިމާސްކޮށްފައިވަނީ، ސިނާމާލެ ބުރިޖާއި ހުޅުމާލެ ހައިވޭ މަތިން ދަތުރުކުރާ ފަރާތްތަކުން ޚާއްސަ ސަމާލުކަމެއް ދިނުމަށެވެ. އުދައިގެ ހާލަތުގައި މި ސަރަހައްދުތަކުގައި ދަތުރުކުރުމުގައި ނުރައްކާތެރިވެދާނެކަމަށް ފުލުހުން ފާހަގަކޮށްފައިވެއެވެ.