އީރާނުގެ ނިއުކުލިއަރ ޕްރޮގްރާމް އެކީ ހަލާކު ކޮށްލާފައިވާކަމަށާއި، އެ ޕްރޮގްރާމް އަލުން ފަށައިފިނަމަ އަނެއްކާވެސް އީރާނަށް ބޮން އަޅާނަނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.
ނޫސްވެރިން ކުރި ބައެއް ސުވާލުތަކަށް ޖަވާބު ދެއްވަމުން ޓްރަމްޕް ވިދާޅުވީ އީރާނާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލުމަށް މިހާރު އޮތް އެންމެ ބޮޑު ހުރަހަކީ އީރާނުގެ ރޫހާނީ ލީޑަރުގެ ބަސްމަގު ކަމުގައެވެ. އަދި ޓްރަމްޕް ވިދާޅުވީ އީރާނުގެ ރޫހާނީ ލީޑަރު އަވަހާރަކޮށް ނުލާ ހުރީ ޓަރަމްޕް އޭނާ އަވަހާރަކޮށްލަން ބޭނުން ނުވާތީ ކަމުގައެވެ.
އީރާނުގެ ނިއުކްލިއާ ޕްރޮގްރާމް ހުއްޓުވުމަށްޓަކައި 30 ބިލިއަން ޑޮލަރުގެ ޕެކޭޖެއް އެމެރިކާއިން އީރާނަށް ހުށަހެޅުމަށް ވިސްނަވަމުން ގެންދަވާކަމަށްވެސް މީޑިއާ ރިޕޯޓުތައް ވަނީ ބުނެފައެވެ. މި ހުށަހެޅުމުގެ ދަށުން އީރާނުން ނިއުކްލިއާ ހަތިޔާރު ތައްޔާރުކުރުމުގެ މަސައްކަތް ފުރިހަމައަށް ދޫކޮށްލައި، ސިވިލް ބޭނުންތަކަށް ނިއުކްލިއާ ޓެކްނޮލޮޖީ ބޭނުންކުރުމަށް އެމެރިކާއިން އެހީތެރިވެދޭނެއެވެ.
ޓްރަމްޕްގެ ސަރުކާރުގެ އިސްވެރިން ކުރައްވަމުން ގެންދަވާ މަޝްވަރާތަކުގައި ހިމެނެނީ ހަމައެކަނި މާލީ އެހީ ދިނުން ނޫންކަމަށާއި، އީރާނާއި ދެކޮޅަށް އަޅާފައިވާ އިޤްތިޞާދީ ދަތިކުރުންތައް ލުއިކޮށް، އެމެރިކާގައި ހިފެހެއްޓިފައިވާ އީރާނުގެ އެސެޓްތައް ދޫކޮށްލުމުގެ ވާހަކަވެސް ހިމެނޭކަމަށް ރިޕޯޓްތަކުން ބުނެއެވެ. މިއީ ދެ ޤައުމުގެ ދެމެދުގައި ދިގު މުއްދަތެއްގައި ހިނގަމުން އައި ހަމަނުޖެހުންތައް ނިމުމަކަށް ގެނައުމަށް ކުރެވޭ މަސައްކަތެއްގެ ގޮތުގައި ބެލެވެއެވެ.
ނަމަވެސް މަސްރަހު ޚާއްޞަކޮށް ދިރާސާކުރައްވާ ބައެއް މާހިރުން ފާހަގަކުރައްވާ ގޮތުގައި، މިފަދަ ބޮޑު ބަދަލުތަކެއް ގެނައުމަށް ދެ ޤައުމުގެ މެދުގައި އޮތް އިތުބާރު ނެތްކަމުގެ މައްސަލައާއި، ކުރީގެ އެއްބަސްވުންތައް ނުހިފެހެއްޓުމުގެ ތާރީޚް ހުރުމުން، މި މަޝްވަރާތައް ކާމިޔާބު ވުމުގެ ފުރުޞަތު ވަރަށް ކުޑައެވެ. އީރާނުގެ ފަރާތުން މި ހުށަހެޅުމަށް ދޭނެ ރައްދަކީ ކޮބައިކަން އަދި ސާފެއް ނުވެއެވެ.
ކޮމެންޓު ފޮނުވާ