ރިޔާސީ ޓިކެޓުގެ ވާދަވެރިކަން ފަސްކޮށް ކައުންސިލު އިންތިހާބަށް ފޯކަސް ކުރުމަށް ސޯލިހް ގޮވާލައްވައިފި

އެމްޑީޕީގެ ބައެއް ލީޑަރުންގެ މެދުގައި އުފެދިފައިވާ ރިޔާސީ ޓިކެޓުގެ ވާދަވެރިކަން ކޮޅަށް ޖައްސާލައި، ކައުންސިލު އިންތިހާބު ޕާޓީއަށް ކާމިޔާބު ކުރުމަށް އެންމެން އެކުގައި މަސައްކަތް ކުރުމަށް ކުރީގެ ރައީސް އިބްރާހިމް މުހައްމަދު ސޯލިހް މިރޭ ގޮވާލައްވައިފިއެވެ.

އެމްޑީޕީއަށް 20 އަހަރު ފުރުމުގެ މުނާސަބަތުގައި ރާއްޖެ ޓީވީގެ 'ފަލަ ސުރުހީ' ޕްރޮގްރާމުގައި ވާހަކަފުޅު ދައްކަވަމުން ސޯލިހް ވިދާޅުވީ، 2028ގެ ރިޔާސީ އިންތިހާބުގެ ވާހަކަ ދެއްކުމުގެ ބަދަލުގައި 2026ގެ ކައުންސިލު އިންތިހާބަށް ތައްޔާރުވުން މުހިންމު ކަމަށެވެ.

2028ގެ ރިޔާސީ އިންތިހާބުގައި ވާދަ ކުރައްވާނެތޯ ކުރެވުނު ސުވާލަށް ސީދާ ޖަވާބެއް ނުދެއްވައި ސޯލިހް ވިދާޅުވީ، އެއީ މިވަގުތު ކުރަން ރަނގަޅު ސުވާލެއް ނޫން ކަމަށާއި، އެމްޑީޕީއާ ދުރުގައި ތިބި ބަޔަކު އަލުން ގުޅިގެން މަސައްކަތް ކުރަން ފަށާ ވަގުތެއްގައި ކުރާ ސުވާލެއް ނޫން ކަމަށެވެ.

"ރިޔާސީ އިންތިހާބުގެ އިންޓްރެސްޓް ހުންނެވި ބޭފުޅުން މިހާރު ވެސް މަސައްކަތް އެބަ ކުރައްވާ. އެކަމަކު އަޅުގަނޑަށް ފެންނަނީ އެކަން އެ ބޭފުޅުން އިހަށް މަޑުޖައްސަވާލަން. ކޮށްފައި ފޯކަސް ކުރަން އެންމެން އެކީގައި ލޯކަލް ކައުންސިލު އިންތިހާބު ކާމިޔާބު ކުރަން،" ސޯލިހް ވިދާޅުވިއެވެ.

އެމްޑީޕީގެ ޗެއާޕާސަން ފައްޔާޒު އިސްމާއިލާއި، މިހަފްތާގައި އެ ޕާޓީއާ އަލުން ގުޅިވަޑައިގެންނެވި ކުރީގެ ރައީސް މުހައްމަދު ނަޝީދު ވަނީ 2028ގައި ވެރިކަމަށް ކުރިމަތިލެއްވުމުގެ ޝައުގުވެރިކަން ފާޅު ކުރައްވާފައެވެ.

ނަޝީދު އަލުން އެމްޑީޕީއާ ގުޅިވަޑައިގަތުމާ މެދު ސުވާލު ކުރެވުނު އިރު، ސޯލިހް ވިދާޅުވީ އައިންސްޓައިންގެ ބަހެއް ނަގަހައްޓަވައި، "ބަލިކަށި މީހުންނޭ ބަދަލު ހިފާނީ. ސްޓްރޯންގް މީހުން މާފް ކުރާނީ. އިންޓެލިޖެންޓް މީހުން އިގްނޯއޭ ކުރާނީ،" ކަމަށެވެ. އަދި އެ މަނިކުފާނަކީ ބަދަލު ހިފާނެ މީހެއް ނޫން ކަމަށާއި، ރައީސް ނަޝީދަށް ވެސް އެކަން އެނގިވަޑައިގަންނަވާނެ ކަމަށް ވިދާޅުވިއެވެ.

ރިޔާސީ އިންތިހާބުގައި ބަލިވުމަށްފަހު ޑިމޮކްރެޓްސްއާ އެމްޑީޕީއާ ދެމެދު މަޝްވަރާތަކެއް ކުރިއަށް ދިޔަ ކަމަށާއި، އޭރު ކޯލިޝަން ހެދުމުގެ ވިސްނުން ގެންގުޅުނު ނަމަވެސް، އެ ބޭފުޅުން އެނބުރި އެމްޑީޕީއަށް ވަޑައިގަތުން އެންމެ ފައިދާވާނެ ގޮތް ކަމަށް ތާއީދު ކުރި ކަމަށް ސޯލިހް ފާހަގަ ކުރެއްވިއެވެ.

މިދިޔަ އަހަރު ވެރިކަމަށް އައި ސަރުކާރަށް ބަހުގެ ހަމަލާތަކެއް ދެއްވަމުން ސޯލިހް ވިދާޅުވީ، ވެރިކަމާ ހަވާލުވިއިރު ގައުމުގެ އިގްތިސާދު ރަނގަޅަށް އޮތް ނަމަވެސް، މިއަދު ދިމާވެގެން އުޅޭ މައްސަލައަކީ ސަރުކާރަށް "މެނޭޖް ކުރަން ނޭނގުން" ކަމަށެވެ. މިގޮތަށް ކަންތައް ދިމާވަނީ ރައީސް މުހައްމަދު މުއިއްޒު އަރިހުގައި ތިއްބެވި ބޭފުޅުން ރަނގަޅު ލަފާ ނުދެއްވާތީ ނުވަތަ އެ ދެއްވާ ލަފާ އަޑު ނާއްސަވާތީ ކަމަށް ވެސް ސޯލިހް ވިދާޅުވިއެވެ.