މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ސަފުތައް ބަދަހިކޮށް، ޕާޓީ މެންބަރުން އެކުވެރިކަމާއެކު ކުރިއަށް ގެންދިއުމަށް މަސައްކަތް ކުރާނެކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ސޯލިހު އެކްސް (ޓްވިޓަރ) ގައި ކުރެއްވި ޕޯސްޓެއްގައި ފާހަގަކުރެއްވީ، އެމްޑީޕީއަކީ ދިވެހިރާއްޖެއަށް ޑިމޮކްރަސީ ގެނައުމުގައި މުހިންމު ދައުރެއް އަދާކުރި ޕާޓީއެއް ކަމަށެވެ. މި ޕާޓީގެ ޒަރީއާއިން އިންސާނީ ޙައްޤުތަކާއި ސިޔާސީ މިނިވަންކަން ކަށަވަރުކޮށް، ވެރިކަމުގެ ކަންކަމުގައި ރައްޔިތުންނަށް ބައިވެރިވުމުގެ ފުރުޞަތު ލިބިގެން ދިޔަކަން ސޯލިހު ހަނދާންކޮށްދެއްވިއެވެ.
ފާއިތުވި 20 އަހަރު ދުވަހުގެ ތެރޭގައި އެމްޑީޕީން ރައްޔިތުންނަށް ރަނގަޅު ދިރިއުޅުމެއް ހޯދައިދިނުމަށް ކުރި މަސައްކަތްތައް އަދިވެސް ފުރިހަމަނުވާކަމަށާއި، ކުރިއަށް އޮތްތާނގައި ކުރަންޖެހޭ ކަންތައްތައް ގިނަކަން ސޯލިހު ފާހަގަކުރެއްވިއެވެ. މިހާރަކީ ގައުމު ކުރީގެ ނިޒާމަށް އަނބުރާ ދިއުމުގެ ނުރައްކާ އޮތް ވަގުތެއް ކަމަށްވެސް ސޯލިހު ވިދާޅުވިއެވެ.
ގައުމު ސަލާމަތްތެރި ތަނަކަށް ގެންދިއުމަށްޓަކައި އެމްޑީޕީގެ މެންބަރުން އެއްބައިވަންތަކަމާއެކު މަސައްކަތް ކުރުމުގެ މުހިންމުކަން ސޯލިހު އިތުރަށް ފާހަގަކުރެއްވިއެވެ.
ބޭސްފަރުވާއަށް މިހާރު މެލޭޝިއާގައި ހުންނަވާ ސޯލިހު، ދާދި ފަހުން އެމްޑީޕީގެ 2028 ވަނަ އަހަރުގެ ރިޔާސީ އިންތިޚާބަށް ޕާޓީގެ ޓިކެޓް ހޯދުމަށް ޕްރައިމަރީގައި ވާދަކުރާނެކަން އިއުލާން ކުރައްވާފައިވެއެވެ.
އެމްޑީޕީގެ ރިޔާސީ ޓިކެޓަށް ވާދަކުރުމަށް ޕާޓީގެ ޗެއާޕާސަން ފައްޔާޒު އިސްމާއިލްވެސް ވަނީ ތައްޔާރުވެފައެވެ. މީގެ އިތުރުން ކުރީގެ ރައީސް މުހައްމަދު ނަޝީދު އެމްޑީޕީއާ އަލުން ގުޅިވަޑައިގަތުމަށްފަހު، ޕާޓީގެ ސިޔާސީ ހަރަކާތްތަކުގައި ބައިވެރިވަމުން ގެންދަވާކަން ފާހަގަކުރެވެއެވެ.
ކޮމެންޓު ފޮނުވާ