ރާއްޖޭގެ އަތޮޅުތަކުގެ މެދުގައި ދަތުރުފަތުރު ކުރުމުގެ ނިޒާމު ހަރުދަނާކުރުމަށް ސަރުކާރުން ކުރިއަށް ގެންދާ ރާއްޖެ ޓްރާންސްޕޯޓް ލިންކް (އާރުޓީއެލް) ގެ ޚިދުމަތް މިހާރު 10 އަތޮޅަކަށް ފުޅާކުރެވިފައިވާ ކަމަށް ސަރުކާރުން ހާމަކުރެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ވަޢުދާ އެއްގޮތަށް، 2025 ވަނަ އަހަރު ނިމުމުގެ ކުރިން ރާއްޖޭގެ އެންމެހައި އަތޮޅުތަކުގައި މި ޚިދުމަތް ފުޅާކުރުމަށް ތައްޔާރީތައް ކުރަމުންދާ ކަމަށް ވެސް ސަރުކާރުން ބުނެއެވެ.
މިވަގުތު އާރުޓީއެލް ޚިދުމަތް ލިބެމުންދާ އަތޮޅުތަކުގެ ތެރޭގައި ހއ، ހދ، ށ، ނ، ރ، ގއ، ގދ އަތޮޅުތަކުގެ އިތުރުން ފުވައްމުލައް ސިޓީ އާއި އައްޑޫ ސިޓީ ހިމެނެއެވެ. އެންމެ ފަހުން މި ޚިދުމަތް ފެށިފައިވަނީ ރ. އަތޮޅުގައި ކަމަށާއި، ޖުލައި މަހުގެ ތެރޭގައި ބ. އަތޮޅުގައި ވެސް މި ޚިދުމަތް ފަށާނެ ކަމަށް ރައީސުލްޖުމްހޫރިއްޔާ އިޢުލާނު ކުރައްވާފައިވެއެވެ.
ރ. އަތޮޅުގައި އާރުޓީއެލް ޚިދުމަތް ފެށުމާ ގުޅިގެން، އެ އަތޮޅުގެ ރައްޔިތުންނަށް ޖުލައި 2 ވަނަ ދުވަހާ ހަމައަށް ހިލޭ ދަތުރުކުރުމުގެ ފުރުޞަތު ހުޅުވާލާފައިވާ ކަމަށް އެމްޓީސީސީން ބުނެއެވެ. މިއީ ރައްޔިތުން މި އާ ޚިދުމަތަށް އަހުލުވެރިކުރުވުމަށާއި، ޚިދުމަތުގެ ފެންވަރު ރަނގަޅުކުރުމަށް ބޭނުންވާ ޚިޔާލުތައް ހޯދުމުގެ ގޮތުން ކުރިއަށް ގެންދާ ޕްރޮގްރާމެއް ކަމަށް އެ ކުންފުނިން މަޢުލޫމާތު ދެއެވެ.
އާރުޓީއެލް ޚިދުމަތް ބޭނުންކުރަން ބޭނުންވާ ފަރާތްތަކަށް ޖުލައި 3 އިން ފެށިގެން ޚާއްޞަ ވެބްސައިޓަކާއި މޮބައިލް އެޕްލިކޭޝަނެއް މެދުވެރިކޮށް ޓިކެޓް ގަނެވޭނެ ކަމަށް އެމްޓީސީސީން ހާމަކުރެއެވެ. މި ޕްލެޓްފޯމްތައް މެދުވެރިކޮށް ފަސޭހަކަމާއެކު ޓިކެޓް ގަތުމުގެ އިތުރުން ދަތުރުތަކުގެ ޝެޑިއުލް ބެލުމާއި ޓިކެޓް ބުކިންގ ކުރުމުގެ ފުރުޞަތު ލިބިގެންދާނެއެވެ.
ރަށު ބަންދުން ވީއްލާ ފަސޭހަކަމާއެކު އެއް އަތޮޅުން އަނެއް އަތޮޅަށް ދަތުރުކުރެވޭނެ ނިޒާމެއް ޤާއިމުވުމުން، ރަށްރަށުގެ މެދުގައި ވިޔަފާރީގެ ގުޅުންތައް ބަދަހިވެ، ވަޒީފާގެ ފުރުޞަތުތައް އިތުރުވުމާއެކު، ޞިއްޙީ އަދި ތަޢުލީމީ ޚިދުމަތްތަކަށް ރައްޔިތުން ފަސޭހައިން ވާޞިލުވެވޭނެ ކަމަށް ސަރުކާރުން ވަނީ ފާހަގަކޮށްފައެވެ. މި މަޝްރޫޢު ފުރިހަމަވުމުން ރާއްޖޭގެ ދަތުރުފަތުރުގެ ނިޒާމަށް އިންޤިލާބީ ބަދަލުތަކެއް އަންނާނެ ކަމަށް ސަރުކާރުން އުންމީދު ކުރެއެވެ.
ކޮމެންޓު ފޮނުވާ