ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން 2،400 އަށް ވުރެ ގިނަ މައްސަލަ ބަލަމުންދާ ކަމަށް ލޭބަރ ރިލޭޝަންސް އޮތޯރިޓީގެ ޑިރެކްޓަރ ޖެނެރަލް މިޒްހަތު ނައީމް ވިދާޅުވެއްޖެއެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުންވަނީ "އޮޕަރޭޝަން ކުރަނގި" ނަމުގައި ބިދޭސީންގެ މަޢުލޫމާތު އެއްކުރުމުގެ ހަރަކާތެއް ފަށާފައެވެ. މި އޮޕަރޭޝަން ކުރިއަށް ގެންދަނީ ކައުންސިލްތަކުގައިވެސް ބައޯމެޓްރިކްސް ނެގޭނެ ނިޒާމް ޤާއިމްކޮށްގެންނެވެ. މި މަސައްކަތުގެ ދަށުން މިހާތަނަށް ލައްކައަކަށްވުރެ ގިނަ ބިދޭސީންގެ މަޢުލޫމާތުވަނީ އެއްކޮށްފައެވެ.
ޕީއެސްއެމްނިއުސްގެ "ރާއްޖެ މިއަދު" ޕްރޮގްރާމުގައި ވާހަކަ ދައްކަވަމުން، ލޭބަރ ރިލޭޝަންސް އޮތޯރިޓީގެ ޑިރެކްޓަރ ޖެނެރަލް މިޒްހަތު ނައީމް ވިދާޅުވީ، އެއިދާރާ މިވަގުތު މަސައްކަތް ކުރަމުންދަނީ ދާޚިލީ ސަލާމަތާއި ފަންނިއްޔާތާބެހޭ ވުޒާރާގެ ބެލުމުގެ ދަށުން ކަމަށާއި ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތުގައި އެއިދާރާވެސް ބައިވެރިވަމުންދާ ކަމަށެވެ.
"ވަރަށް ޒަމާންވީ މައްސަލައެއް ބިދޭސީން ކަންތަކަކީ. ހާއްސަކޮށް ހޯމްލޭންޑް މިނިސްޓްރީން ވަރަށް ގިނަ މަސައްކަތްތަކެއް ކޮށްފި. އަޅުގަނޑުމެންވެސް މިވަގުތު މިތިބީ ހޯމްލޭންޑް މިނިސްޓްރީގެ ދަށުގައި. މިވަގުތަށް ގާތްގަނޑަކަށް 2457 މައްސަލައެއް އެބަ ބަލަން. މިނިސްޓަރުގެ އެންގެވުމަށް އަޅުގަނޑުމެން ޓާގެޓަކީ ކުރިއަށް އޮތް 1 މަސް ދުވަހުގެ ތެރޭގައި އެ މައްސަލަތައް ނިންމާ ބިދޭސީންގެ ކަންތައް ހަމަހަމަ މަގަށް އަޅުވަން މިނިސްޓްރީއަށް އަޅުގަނޑުމެންގެ ފަރާތުން ދެވެން އޮތް އެއްބާރުލުމެއް ދިނުން," ޑިރެކްޓަރ ޖެނެރަލް ވިދާޅުވިއެވެ.
އެލްއާރްއޭއިން މައިގަނޑު ގޮތެއްގައި ބަލަމުންދަނީ، ބިދޭސީން ގެއްލިގެން ރިޕޯޓްކޮށްފައިވާ މައްސަލަތައް ކަމަށް އެއޮތޯރިޓީން ވިދާޅުވެއެވެ. މިގޮތަށް ހުށަހަޅާ މައްސަލަތަކުގައި ބިދޭސީން ފިލައިގެން ދިއުމަށް މެދުވެރިވި ސަބަބުތައް ބަލާ، ޤަވާއިދުގެ ތެރެއަށް ބިދޭސީން ވެއްދުމަށް ދަނީ މަސައްކަތް ކުރަމުންނެވެ. މިފަދަ މައްސަލަތައް ބަލާއިރު، ދާޚިލީ ވުޒާރާއަށް ލިޔުމުން އަންގާ، އެވުޒާރާއާ ގުޅިގެން މައްސަލަތައް ހައްލުކުރުމަށް ވަރަށް ބޮޑަށް މަސައްކަތް ކުރާކަން ލޭބަރ ރިލޭޝަން އޮތޯރިޓީން ވިދާޅުވެއެވެ.
ސަރުކާރުން ޤަވާއިދާއި ޚިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގައި ބިދޭސީންގެ ބަޔޯމެޓްރިކްސް އަދާހަމަ ކުރުމަށް މިމަހުގެ ނިޔަލަށް ވަނީ މުއްދަތު ދީފައެވެ. މިމުއްދަތުގައި އެ މައުލޫމާތު އަދާހަމަ ނުކުރާނަމަ، ފިޔަވަޅު އަޅާނެ ކަމަށްވެސް ދާޚިލީ ވުޒާރާއިން ވިދާޅުވެއެވެ.
ކޮމެންޓު ފޮނުވާ