ނިލަންދޫގެ މަގުތަކުން ނަޖިސް އެރުމުގެ މައްސަލަ އަންނަ އަހަރު ފަހުކޮޅަށް ހައްލުކުރެވޭނެ ކަމަށް މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވެއްޖެއެވެ. މިއީ ނިލަންދޫގެ ރައްޔިތަކު، ރަށުގެ ހާލަތު ފެންނަ ފޮޓޯތަކަކާއެކު ފާޅުކުރި ކަންބޮޑުވުންތަކަށް މަތީން ދެއްވި ޖަވާބެކެވެ.
ނިލަންދޫގެ ނަރުދަމާ ނިޒާމު ރަނގަޅުކުރުމަށް، އެ ނިޒާމު ޑިޒައިންކުރުމާއި އަމަލީ މަސައްކަތް ކުރުމަށް އިންފްރާސްޓްރަކްޗާ މިނިސްޓްރީން އެމްޑަބްލިއުއެސްސީއާ ހަވާލުކޮށްފައިވަނީ 2023 ވަނަ އަހަރުގެ ނޮވެމްބަރު 17 ގައެވެ. މި އެއްބަސްވުމުގައިވަނީ 540 ދުވަހުގެ ތެރޭގައި މަސައްކަތް ނިންމާ ގޮތަށެވެ. އެހެންނަމަވެސް، އެރަށުގެ ރައްޔިތުން ބުނާ ގޮތުގައި މިހާތަނަށް އެ މަސައްކަތް ފެށިފައެއް ނުވެއެވެ.
އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވިގޮތުގައި، ނިލަންދޫގައި މިހާރު ބޭނުންކުރަމުންދާ "ވެކިއުމް" ނަރުދަމާ ނިޒާމަކީ 15 އަހަރަށް އަމާޒުކޮށް ޑިޒައިންކޮށްފައިވާ ނިޒާމެކެވެ. މިހާރު މި ނިޒާމަށް 18 އަހަރުވެފައިވާތީ، އެ ނިޒާމު ހިންގާ މަރާމާތުކޮށް ބެލެހެއްޓުމުގައި ދިމާވަމުންދާ ގޮންޖެހުންތަކުގެ ސަބަބުން ރައްޔިތުންނަށް ދިމާވާ ތަކުލީފުތަކަށް ދާއިމީ ހައްލެއް ހޯދުމަށްޓަކައި "ގްރެވިޓީ" ނަރުދަމާ ނިޒާމެއް ޤާއިމްކުރުމުގެ މަސައްކަތް ކުންފުންޏާ ހަވާލުކޮށްފައިވެއެވެ.
މަތީން ވިދާޅުވީ، އަލަށް ގާއިމްކުރާ ނިޒާމުގެ ޑިޒައިން މަސައްކަތް މިހާރު ފަށާފައިވާ ކަމަށާއި، ޑިޒައިން މަސައްކަތަށް ބޭނުންވާ ބިންތައް ކަނޑައެޅުމާއި ލޭންޑް ސާވޭ ހެދުމާއި ޓޮޕޮގްރަފިކް ސާވޭގެ މަސައްކަތް ނިމިފައިވާ ކަމަށެވެ. އަދި ޑިޒައިން މަސައްކަތް ނިންމުމަށްފަހު، ކަމާބެހޭ އިދާރާތަކުގެ ހުއްދަ ހޯދައި، އީއައިއޭ ނިންމައި، އަމަލީ މަސައްކަތް އަންނަ މަހު ފެށުމަށް ތާވަލުކޮށްފައިވާ ކަމަށް މަތީން ވިދާޅުވިއެވެ. އަންނަ މަހު ފަށާ މަސައްކަތް ނިންމާލެވޭނީ 2026 ވަނަ އަހަރުގެ ފަހުކޮޅުކަމަށް މަތީން ވަނީ ވިދާޅުވެފައެވެ.
މަތީން އިތުރަށް ވިދާޅުވިގޮތުގައި، "މިހާރު ރަށުގައި އަޅާފައިވާ ވެކިއުމް ނިޒާމްގެ ޚިދުމަތް މެދުނުކެނޑޭނެ ގޮތަކަށް މުޅިން އާ ގްރެވިޓީ ނިޒާމެއް ގާއިމްކުރުމަކީ ގޮންޖެހުންތަކަކާ ކުރިމަތިވާނެ މަސައްކަތެއް" ކަމަށެވެ. އެމްޑަބްލިއުއެސްސީގެ މަސައްކަތުގެ ތެރޭގައި ހިމެނެނީ ހަމައެކަނި ގްރެވިޓީ ނިޒާމު ގާއިމްކުރުމުގެ މަސައްކަތްކަމަށާއި، އެ މަސައްކަތް ކުރިއަށްދާ ދުވަސްވަރުވެސް މިހާރު ބޭނުންކުރަމުންދާ ވެކިއުމް ސިސްޓަމް މަރާމާތުކޮށް ހިންގާ ބަލަހައްޓާނީ ނިލަންދޫގައި މިހާރުވެސް ޔުޓިލިޓީގެ ޚިދުމަތް ފޯރުކޮށްދޭ އިދާރާތަކުންކަމަށްވެސް މަތީން ވިދާޅުވިއެވެ.
