މިއަހަރު ނިމުމުގެ ކުރިން މާލެއާއި ހުޅުމާލޭގައި ފެން ރައްކާކުރެވޭ ޖާގަ 28 އިންސައްތައަށް އިތުރުވާނެކަމަށް އެމްޑަބްލިއުއެސްސީން މިއަދު ހާމަކޮށްފިއެވެ. މިއަދަކީ އެމްޑަބްލިއުއެސްސީ އުފެދުނުތާ 30 އަހަރު ފުރޭ ދުވަސްކަމަށްވާއިރު، ފެނުގެ ރައްކާތެރިކަން ޔަގީންކުރުމަކީ އެ ކުންފުނީގެ އެންމެ މުހިންމު އެއް އަމާޒުކަމުގައި އެ ކުންފުނިން ފާހަގަކޮށްފައި ވެއެވެ.
ގްރޭޓަރ މާލެ ސަރަހައްދުގައި ފެން އުފައްދާ މައި މަރުކަޒުގެ އިތުރުން، މާލޭގެ އެހެން ދެ ސަރަހައްދެއްގައި ވެސް ފެން އުފައްދާ މަރުކަޒު ގާއިމްކޮށްފައިވާކަން އެމްޑަބްލިއުއެސްސީން ފާހަގަކޮށްފައިވެއެވެ. އަދި މިހާރުވެސް މާލެއާއި ހުޅުމާލޭގައި އިތުރު ފެން ތާނގީތަކާއި ޕްލާންޓްތައް ގާއިމްކުރުމުގެ މަސައްކަތް ކުރިއަށްދާކަން ވެސް އެ ކުންފުނިން ބުނެފައިވެއެވެ.
އެމްޑަބްލިއުއެސްސީގެ ބަޔާނުގައި ބުނެފައިވާ ގޮތުގައި، 2025 ވަނަ އަހަރު ނިމޭއިރު ފެން އުފެއްދުމުގެ ގާބިލުކަން 26 އިންސައްތައަށް އަދި ފެން ރައްކާކުރެވޭ މިންވަރު 28 އިންސައްތައަށް އިތުރުވެގެންދާނެއެވެ. މީގެއިތުރުން، މާލެއާއި ހުޅުމާލޭގެ ފެނުގެ ވިއުގަ ގުޅާލުމަށް ސިނަމާލެ ބްރިޖް މެދުވެރިކޮށް އަޅާފައިވާ ފެނުގެ މައި ވިއުގަ ޑިސްއިންފެކްޓްކޮށް، ޕްރެޝަރ ޓެސްޓްކުރުމުގެ މަސައްކަތް ނިމިފައިވާ ކަމަށާއި، ޓްރާންސްފަރ ޕަމްޕްސްޓޭޝަން ގާއިމުކުރުމުގެ މަސައްކަތުގެ ބޮޑުބައެއްވެސް ނިމިފައިވާ ކަމަށް އެ ކުންފުނިން ބުނެފައިވެއެވެ.
މި މަޝްރޫޢު ފުރިހަމައަށް ނިމި، މާލެއާއި ހުޅުމާލޭގެ ފެނުގެ ވިއުގަ ގުޅާލައި ޚިދުމަތްދޭން ފަށާނީ މިއަހަރުގެ ފަހުކޮޅުކަމަށް އެމްޑަބްލިއުއެސްސީން ހާމަކޮށްފައިވެއެވެ. މި މަޝްރޫޢު ނިމުމުން، ބޭނުންވެއްޖެ ހާލަތެއްގައި މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް ގަޑިއަކު 800 ޓަނުގެ ފެން ޕަންޕުކުރުމުގެ ގާބިލުކަން ލިބިގެންދާނެކަމަށްވެސް އެމްޑަބްލިއުއެސްސީން ފާހަގަކޮށްފައިވެއެވެ.
