ޖެނުއަރީ މަހުގެ ތެރޭގައި ކުޑަކުދިންނަށް އަނިޔާކުރުމާއި ގުޅުންހުރި 112 މައްސަލައެއް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓަށް ހުށަހެޅިފައިވާ ކަމަށް އެ މިނިސްޓްރީން މިއަދު ހާމަކޮށްފިއެވެ.
މިނިސްޓްރީގެ ތަފާސް ހިސާބުތަކުން ދައްކާގޮތުގައި މި މައްސަލަތަކުގެ ތެރެއިން އެންމެ ގިނައިން ހުށަހެޅިފައިވަނީ ކުޑަކުދިން ބެލެހެއްޓުމުގައި އިހުމާލުވުމާ ގުޅުންހުރި 32 މައްސަލައެވެ. އޭގެ އިތުރުން، ކުޑަކުދިންނަށް ޖިސްމާނީ ގޮތުން އަނިޔާކުރުމުގެ 21 މައްސަލައާއި، ޖިންސީ ގޯނާކުރުމުގެ 20 މައްސަލަ ވެސް ވަނީ ހުށަހެޅިފައެވެ.
މީގެ އިތުރަށް، ގެވެށި އަނިޔާއާ ގުޅުންހުރި 14 މައްސަލައަކާއި ހަގާކުރުމުގެ 4 މައްސަލައެއް ވެސް މިނިސްޓްރީއަށް ހުށަހެޅުނު ކަމަށް އެ މިނިސްޓްރީން ބުނެފައިވެއެވެ. މީގެ އިތުރުން، ގްރޫމްކުރުމާއި، ފުރައްސާރަކުރުމާއި، ބްލެކްމެއިލްކުރުން ފަދަ އެހެނިހެން މައްސަލަތައްވެސް މި މުއްދަތުގެ ތެރޭގައި މިނިސްޓްރީއަށް ވަނީ ހުށަހެޅިފައެވެ.
މިނިސްޓްރީން މިކަމާ ގުޅޭގޮތުން ދެއްވި ބަޔާނެއްގައި ވިދާޅުވެފައިވަނީ، "ކުޑަކުދިންނަށް ކުރިމަތިވާ އަނިޔާތައް ހުއްޓުވުމަށް ޤައުމީ ފެންވަރުގައި ހޭލުންތެރިކަން އިތުރުކުރުމުގެ ޕްރޮގްރާމްތައް ކުރިއަށް ގެންދިއުމަށް ރޭވިފައިވާ" ކަމަށެވެ.
ކުޑަކުދިންނަށް އަނިޔާކުރުމާއި ގުޅުންހުރި މައްސަލަތައް އިތުރުވަމުންދާކަމީ ކަންބޮޑުވާންޖެހޭ ކަމެއް ކަމަށް ކުޑަކުދިންގެ ޙައްޤުތަކަށް މަސައްކަތްކުރާ ޖަމްޢިއްޔާތަކުން ފާހަގަކޮށްފައިވެއެވެ.
ކޮމެންޓު ފޮނުވާ