ހުޅުމާލޭގައި އަމިއްލަ ފަރާތްތަކުން އިމާރާތްކުރަމުންދާ މިސްކިތްތަކުގެ ތެރެއިން ދެ މިސްކިތެއްގެ މަސައްކަތް މި އަހަރުގެ ތެރޭގައި ނިމޭނެ ކަމަށް އިސްލާމީ ކަންތައްތަކާ ބެހޭ ވުޒާރާއިން އިއްޔެ ހާމަކޮށްފިއެވެ.
މި މިސްކިތްތަކުގެ ތެރެއިން އެންމެ އަވަހަށް މަސައްކަތް ނިމޭނެ ކަމަށް ލަފާކުރެވެނީ އަޙްމަދު ސަލީމް އަދި ޙަފީޒާ އަޙްމަދުގެ ފަރާތުން އިމާރާތްކުރަމުންދާ މިސްކިތެވެ. މި މިސްކިތުގެ މަސައްކަތް މި އަހަރުގެ މެއި މަހުގެ ތެރޭގައި ނިމޭނެ ކަމަށް ލަފާކުރެވެއެވެ. އަދި އެސްޖޭ ކޮންސްޓްރަކްޝަން ޕްރައިވެޓް ލިމިޓެޑުން އިމާރާތްކުރަމުންދާ މިސްކިތުގެ މަސައްކަތް މި އަހަރުގެ ޑިސެމްބަރު މަހުގެ ތެރޭގައި ނިމޭނެ ކަމަށް ލަފާކުރެވެއެވެ. މި މިސްކިތުގައި މިހާރު ކުރިއަށްދަނީ ކޮންކްރީޓް އާރޗްތައް ހެދުމުގެ މަސައްކަތެވެ.
މީގެ އިތުރުން ފެޑޯ ޕްރައިވެޓް ލިމިޓެޑް، ބެޗް ކޮންސްޓްރަކްޝަން، އަދި ސަންފްރޮންޓުން އިމާރާތްކުރަމުންދާ މިސްކިތްތަކުގެ މަސައްކަތް 2026 ވަނަ އަހަރުގެ މާރިޗު މަހުގެ ތެރޭގައި ނިމޭނެ ކަމަށް ލަފާކުރެވެއެވެ. ފެޑޯ ޕްރައިވެޓް ލިމިޓެޑުން އިމާރާތްކުރާ މިސްކިތުގައި މިހާރު ކުރިއަށްދަނީ ކޮންކްރީޓް މަސައްކަތް ކަމަށާއި، ބެޗް ކޮންސްޓްރަކްޝަނުން އިމާރާތްކުރާ މިސްކިތުގައި ކުރިއަށްދަނީ ސިމެންތި ޖެހުމުގެ މަސައްކަތް ކަމަށް އެ ވުޒާރާއިން ހާމަކުރެއްވިއެވެ.
އިސްލާމީ ކަންތައްތަކާ ބެހޭ ވުޒާރާއިން އިތުރަށް ވިދާޅުވީ، ހުޅުމާލެ އާއި ރާއްޖޭގެ އެކި ހިސާބުތަކުގައި އިމާރާތްކުރަމުންދާ މިސްކިތްތަކުގެ މަސައްކަތް އަވަސްކުރުމަށްޓަކައި، މިސްކިތްތަކުގެ މަސައްކަތްކުރާ ފަރާތްތަކާއި ވުޒާރާއާ ގުޅިގެން ގިނަ މަސައްކަތްތަކެއް ކުރަމުންދާ ކަމަށެވެ.
