ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ފައިބަރު މަސައްކަތްކުރާ ތަންތަނުގައި ހުންނަންޖެހޭ ސިއްހީ މިންގަނޑުތައް ކަނޑައަޅައި، އެކަމާގުޅޭ އައު ގަވާއިދެއް ނެރެފިއެވެ. މި ގަވާއިދުގެ މައިގަނޑު މަގުސަދަކީ ފައިބަރުކުރާ ތަންތަނަކީ ސިއްހީ ރައްކާތެރިކަމުގެ މިންގަނޑުތަކާ އެއްގޮތަށް ހިންގާ ތަންތަނަށް ހެދުމެވެ.
މި ގަވާއިދުގެ ދަށުން، ފައިބަރު މަސައްކަތުގައި ބޭނުންކުރާ ނުރައްކާތެރި މާއްދާތަކުން އާންމު ރައްޔިތުންނާއި، ތިމާވެށްޓާއި، އެތަންތަނުގައިވާ ދިރުންތަކަށް ސަލާމަތާއި ރައްކާތެރިކަން ލިބިދިނުމަށް އިސްކަންދޭންޖެހެއެވެ. ކަނޑުދަތުރުފަތުރުކުރާ އުޅަނދުފަހަރު ބަންނަ ތަންތަން ގާއިމްކުރަންވާނީ ގާނޫނާ އެއްގޮތްވާ ގޮތުގެ މަތިންނެވެ.
މީހުން ދިރިއުޅޭ ސަރަހައްދުތަކާއި ގޯތިތައް ނުވަތަ ބަނދަރު ފަދަ ފައިބަރުގެ މަސައްކަތްކުރަން ކަނޑައަޅާފައިނުވާ ސަރަހައްދުތަކުގައި ފައިބަރުގެ މަސައްކަތްކުރާނަމަ، އެޗްޕީއޭގެ ހެލްތު އެންޑް ސޭފްޓީ އިންސްޕެކްޝަނަށް ބިނާކޮށް އެ ރަށެއްގެ ކައުންސިލުގެ ހުއްދަ ހޯދަންޖެހެއެވެ. އަދި ފައިބަރުގެ މަސައްކަތްކުރާ ތަންތަން ފަރުމާކުރަންވާނީ މަސައްކަތް ރައްކާތެރިކަމާއެކު ކުރެވޭނެ ގޮތަށެވެ.
ފައިބަރު މަސައްކަތްކުރާ ތަންތަނުގައި ދުންފަތުގެ އިސްތިއުމާލުކުރުން މަނާކަން އަންގައިދޭ ބޯޑާއި، ހުއްދަ ދޫކޮށްފައިވާ ފަރާތްތަކަށް އެކަނި ވަދެވޭނެކަން އަންގައިދޭ ބޯޑާއި، ނުރައްކާތެރި ސަރަހައްދެއްކަން އަންގައިދޭ ބޯޑު ހަރުކުރަންޖެހެއެވެ. މީގެއިތުރުން ކުޑަކުދިންނާއި މާބަނޑު މީހުން ވަނުން މަނާކަމާއި، ކުއްލި ހާލަތުގައި ގުޅާނެ ނަންބަރު އަދި ކެއިންބުއިން މަނާކަން އަންގައިދޭ ބޯޑުތައްވެސް ބަހައްޓަންޖެހެއެވެ.
މަސައްކަތްކުރާ މުވައްޒަފުން ޕާސަނަލް ޕްރޮޓެކްޓިވް އިކުއިޕްމަންޓް ބޭނުންކުރޭތޯ ބެލުމަކީ ވެރިފަރާތުގެ ޒިންމާއެކެވެ. މި ތަންތަނުގައި ދުންފަތުގެ އިސްތިއުމާލުކުރުމާއި، ކެއިންބުއިމާއި، ކާތަކެތި ރައްކާކުރުން މަނާވެފައިވެއެވެ. އަދި މި ގަވާއިދާ ޚިލާފުވާ ފަރާތްތައް 2000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރެވޭނެއެވެ.
