ދިވެހިރާއްޖެއާއި އިންޑިއާއާ ދެމެދު ދިފާއީ އެއްބާރުލުން އިތުރަށް ހަރުދަނާކުރުމާ ގުޅޭގޮތުން ޑިފެންސް މިނިސްޓަރު މުހައްމަދު ޣައްސާން މައުމޫނާއި އިންޑިއާގެ ހައި ކޮމިޝަނަރު ބާލަސުބްރަމާނިއަން މަޝްވަރާތަކެއް ކުރައްވައިފިއެވެ. މި މަޝްވަރާތައް ކުރިއަށް ގެންދެވުނީ ހައި ކޮމިޝަނަރު ޑިފެންސް މިނިސްޓަރުގެ އަރިހަށް ކުރެއްވި އިޙްތިރާމުގެ ޒިޔާރަތެއްގައެވެ.
މި މަހުގެ އަށްވަނަ ދުވަހު މިނިސްޓަރު ޣައްސާން ވަނީ އިންޑިއާއަށް ރަސްމީ ދަތުރުފުޅެއް ކުރައްވައިފައެވެ. މި ދަތުރުފުޅުގައި އިންޑިއާގެ ޑިފެންސް މިނިސްޓަރު ރަޖްނަތު ސިންހްއާ އެކު ބޭއްވެވި މަޝްވަރާތަކުގައި، އެމްއެންޑީއެފް އިތުރަށް ހަރުދަނާކުރުމަށް ބޭނުންވާ އާލަތްތައް ފޯރުކޮށްދިނުމަށް ވަނީ އެއްބަސްވެވިފައެވެ.
ދެ ގައުމުގެ ޑިފެންސް މިނިސްޓަރުންގެ ބައްދަލުވުމުގައި، އިންޑިއާގެ މިނިސްޓަރު ރަޖްނަތު ވަނީ ދިވެހިރާއްޖެއަކީ އިންޑިއާގެ 'ނެއިބާހުޑް ފަސްޓް' ޕޮލިސީގެ ދަށުން ޚާއްސަ މަގާމެއް ދީފައިވާ ގައުމެއްކަން ފާހަގަކުރައްވައިފައެވެ. އަދި ދިވެހީންނަށް ބޭނުންވާ ކަންކަމުގައި އިންޑިއާއިން އަބަދުވެސް އެހީތެރިވެދޭނެކަމުގެ ޔަގީންކަން ވެސް އޭނާ ވަނީ ދެއްވައިފައެވެ.
