މޯލްޑިވްސް ފުޑް އެންޑް ޑްރަގް އޮތޯރިޓީން ކުރިން ރާއްޖެ އެތެރެކުރުން މަނާކޮށްފައިވާ ދެ ބާވަތެއްގެ ބޭސް، އޭގެ ރައްކާތެރިކަން ކަށަވަރު ކުރުމަށްފަހު އަލުން ވިއްކުމުގެ ހުއްދަ ދީފިއެވެ. މި ބޭސްތަކަކީ ޕާކިސްތާނުގެ އެފްރޯޒާ ކެމިކަލް އިންޑަސްޓްރީން އުފައްދާ މެފްނެކް ސަސްޕެންޝަން ސިރަޕާއި މެލޭޝިޔާގެ ކޮޓްރާ ފާމާގެ އެކްސެލް މެފެނެމިކް އެސިޑް ސަސްޕެންޝަން ސިރަޕެވެ. މި ދެ ބޭސް މަނާކުރެވިފައިވަނީ މިދިޔަ ނޮވެމްބަރު މަހުގެ ތެރޭގައެވެ.
އެމްއެފްޑީއޭ އިން ހާމަކުރި ގޮތުގައި މާކެޓުގައި ލިބެންހުރި މި ދެ ބޭހުގެ ބެޗްތައް ވަނީ ޓެސްޓުކޮށް، ބަލަންޖެހޭ ހުރިހާ ކަމެއް ބަލައި، ބޭހުގެ ރައްކާތެރިކަން ކަށަވަރުކުރެވިފައެވެ. އެހެންނަމަވެސް، ރައްކާތެރިކަމުގެ އިތުރު ފިޔަވަޅެއްގެ ގޮތުން، މި ދެ ބޭސް އިމްޕޯޓްކުރާއިރު ޑައިއީތައިލިން ގްލައިކޯލް އަދި އިތައިލީން ގްލައިކޯލްގެ އެނަލައިސިސް ރިޕޯޓް ހުށަހަޅަންޖެހޭނެއެވެ. މި ރިޕޯޓަކީ ވާންޖެހޭނީ ޑަބްލިއުއެޗްއޯ އިން ހުއްދަ ދީފައިވާ ލެބޯޓަރީއަކުން ހަދާފައިވާ ޓެސްޓް ރިޕޯޓަކަށެވެ.
