ޑިމޮކްރެޓްސް ޕާޓީން މިއަދު، ޕާޓީގެ މެންބަރުން ގަވާއިދާ ޚިލާފަށް ވަކިކޮށް، ވެރިކަންކުރާ ޕީއެންސީއަށް ބަދަލުކޮށްފައިވާ މައްސަލަ ތަޙްޤީޤުކޮށްދިނުމަށް އެދި ފުލުހުންނާއި އިލެކްޝަންސް ކޮމިޝަން (އީސީ) އަށް ހުށަހަޅާއިފިއެވެ.
ޑިމޮކްރެޓްސްގެ ކައުންސިލް މެންބަރު މުޙައްމަދު ސައިފް ފާތިޙު 'ސަން' އަށް މަޢުލޫމާތު ދެއްވިގޮތުގައި، މިދިޔަ އޮގަސްޓު މަހުން ފެށިގެން 700 އެއްހާ މެންބަރުން ޕާޓީން ވަކިވެފައިވާކަން ފާހަގަކުރެވިފައިވެއެވެ. މި މައްސަލައިގައި އީސީގެ ސަމާލުކަމަށް ގެނެސްފައިވަނީ ޖިނާއީ ތަޙްޤީޤެއް ހިންގުމަށް ކަމާބެހޭ އިދާރާތަކަށް ބާރުއެޅުމަށާއި، ސައްޙަނޫން ފޯމު ހުށަހަޅާފައިވާ ފަރާތްތަކާމެދު އަޅަންޖެހޭ ފިޔަވަޅުތައް އެޅުމަށެވެ.
ސައިފް ވިދާޅުވިގޮތުގައި، ވެރިކަންކުރާ ޕާޓީއަށް ބަދަލުވާ މީހުންގެ ތެރެއިން ގިނަ ބަޔަކު އެކަމަށް އެއްބަސްވެފައި ތިބި ނަމަވެސް، 10 މީހުންގެ ތެރެއިން 8 މީހުންނަކީ އެމީހުންނަށް ނޭނގި ޕާޓީއަށް ވައްދާފައިވާ މީހުންނެވެ. މިއީ ރައްޔިތުންގެ އިތުބާރާއެކު ހިއްސާކޮށްފައިވާ މަޢުލޫމާތުތަކެއްގެ ނަހަމަ ބޭނުންހިފައި، 'ވައްކަން' ކޮށްގެން ހިންގާފައިވާ ބޮޑު ޖަރީމާއެއްކަމަށް އޭނާ ވިދާޅުވިއެވެ.
މި މައްސަލައާ ގުޅިގެން ބައެއް އާންމު ރައްޔިތުން ވެސް ވަނީ ވަގު ފޯމުތަކުގެ މައްސަލަ ފުލުހުންނަށް ހުށަހަޅާފައެވެ. ސިޔާސީ ޕާޓީތަކަށް ވަގަށް މީހުން ވެއްދުމުގެ މައްސަލަ މިފަހުން ފެންމަތިވެފައިވަނީ ޕާޓީތަކަށް ލިބޭ ފައިސާގެ އަދަދު އިތުރުކުރުމަށް ކަމަށް ތުހުމަތުކުރެވެއެވެ. މި މައްސަލައިގައި ޕީއެންސީއަށް ތުހުމަތުކުރެވޭއިރު، އެހެން ބައެއް ޕާޓީތަކާއި ޖަމްޢިއްޔާތަކުން ވެސް ވަނީ މިކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވާލާފައެވެ.
މީގެއިތުރުން، ޑީއެންއާރުގެ އޮފީސް އިމާރާތުގައި ޕީއެންސީއަށް ފޯމު ފުރުމުގެ މައްސަލައެއް ވެސް ފެންމަތިވެ، އެކަމާ ގުޅޭ ފޮޓޯތަކެއް މީސްމީޑިއާގައި ލީކުވެފައިވެއެވެ. ޕީއެންސީން ވަނީ ބައެއް ސައްޙަކަން ކަށަވަރުނުކުރެވޭ ފޯމުތަކެއް އީސީއަށް ހުށަހެޅިކަން އިޢުތިރާފުވެފައެވެ. ނަމަވެސް އެއީ ގަސްތުގައި ކުރި ކަމެއް ނޫންކަމަށާއި، ފޯމުތަކުގެ ސައްޙަކަން ކަށަވަރުކުރެވޭނެ ގޮތެއް ނެތުމުން ދިމާވި ކަމެއްކަމަށް އެ ޕާޓީން ބުނެފައިވެއެވެ.
