އައިލެންޑް އޭވިއޭޝަން (އައިއޭއެސް)ގެ ޗެއާމަންގެ މަގާމަށް ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އަހުމަދު ޝަފީއު އައްޔަންކުރެއްވިކަން މިއަދު އެ ކުންފުނިން ހާމަކޮށްފިއެވެ. އެކްސްގައި ކުރި ޕޯސްޓެއްގައި އައިއޭއެސްއިން ވަނީ އަހުމަދު ޝަފީއުއަށް މަރުހަބާ ކިޔާފައެވެ.
ޝަފީއުއަކީ ކުރިން ވެސް އައިއޭއެސްގެ ޗެއާމަންކަން ކުރައްވާފައިވާ ބޭފުޅެކެވެ. އެގޮތުން އޭނާ ވަނީ ކުރީގެ ރައީސް ޔާމީންގެ ވެރިކަމުގައި 2014 އިން 2018 ގެ ނިޔަލަށް އެ މަގާމު ފުރުއްވާފައެވެ. އެ ދުވަސްވަރު އޭނާ ހުންނެވީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުގެ މަގާމުގައި ވެސް މެއެވެ. މިހާރު ވެސް އޭނާ ހުންނެވީ ހަޔާ އެޑިއުކޭޝަންގެ ސްޓޭޓް މިނިސްޓަރުގެ މަގާމުގައެވެ. އެ މަގާމަށް އޭނާ އައްޔަންކުރެއްވީ 2023 ވަނަ އަހަރުގެ ޑިސެމްބަރު މަހުއެވެ.
އަހުމަދު ޝަފީއުގެ ސަރުކާރުގެ ވަޒީފާގެ ތަޖުރިބާގެ ތެރޭގައި، ކުރީގެ ރައީސް ވަހީދު ހަސަން މަނިކުގެ ވެރިކަމުގައި 2012 އިން 2013 އަށް ފިޝަރީޒް މިނިސްޓަރުކަން ކުރެއްވުން ވެސް ހިމެނެއެވެ.
