ދަތުރު ކުރުމުގެ އެއްވެސް ރެކޯޑެއްނެތް، ކޯވިޑް19ގެ އާ ސްޓްރެއިންގެ ފުރަތަމަ ކޭސް އެމެރިކާއިން ފެނިއްޖެއެވެ.
އިގިރޭސިވިލާތުން އެންމެ ފުރަތަމަ ފެނުނު، އަސްލު ވައިރަހަށްވުރެ އެތައް ގުނައެއް ފަސޭހަކޮށް ގައިންގަޔަށް އަރާ މި އާ ސްޓްރެއިން ފެނިފައިވަނީ، އެމެރިކާގެ ކޮލަރާޑޯއިންނެވެ. މި ސްޓޭޓުން އާސްޓްރެއިން ފެނިފައިވާކަން އިއުލާން ކުރެއްވީ، އެސްޓޭޓުގެ ގަވަރުނަރު ޖެރާޑް ޕޯލިސްއެވެ.
މިވޭރިއެންޓެ ފެނިފައިވަނީ، ކޮލެރާޑޯ ސްޓޭޓުގެ އިރު ދެކުނުގެ ސަރަހައްދެއް ކަމުގައިވާ ޑެެންވަރގައި އައިސޮލޭޝަންގައި ހުރި، އުމުރުން 20 އަހަރުގެ މީހެއްގެ ހަށިގަޑުންނެވެ. އެ ސްޓޭޓުގެ ސިއްޙީ އޮފިޝަލުން ވިދާޅުވާ ގޮތުގައި، މިމީހާއަކީ އެއްވެސް ވަރަަކަށް ދަތުރު ފަތުރުކޮށް އުޅުނުކަމުގެ އެއްވެސް ރެކޯޑެއް އޮތް މީހެއް ނީންކަމުގައެވެ.
ކޮލެރާޑޯގެ ސްޓޭޓް ލެބޯޓްރީއަށް ކޯވިޑް19 ވައިރަހުގެ މި ސްޓްރެއިން ޔަގީން ކުރެވުމާއެކު، ސެންޓާރސް ފޯރ ޑިސީސް ކޮންޓްރޯލް އެންޑް ޕްރިވެންޝަން އަށްވަނީ މިމައުލޫމާތު މިހާރު ހިއްސާ ކޮށްފައެވެ.
އިގިރޭސިވިލާތުގެ ސައިންޓިސްޓުން ލަފާ ކޮށްފައިވާ ގޮތުގައި، އެގައުމުންވެސް އަލަށް ފެނިފައިވާ، ވައިރަހުގެ މި ސްޓްރެއިންއަކީ، ކުރިން ފެނިފައިވާ ސްޓްރެއިންތަކަށްވުރެވެސް މާފަސޭހައިން ގައިންގަޔަށް ވާސިލްވާ، ކޯވިޑް19 ވައިރަހުގެ މުޅިން އާ ވައްތަރެކެވެ.
އެމެރިކާއިން ކޯވިޑް19ގެ މުޅިން އާ ސްޓްރެއިން ފެނުމާގުޅިގެން، ކޮލެރާޑޯގެ ސިއްޙީ އިދާރާއިން ނެރުނު ބަޔާނެއްގައި ބުނެފައިވަނީ، މިހާރު ދެމުންދާ ވެކްސިންތައް، އަލުން މިފެނުނު ސްޓްރެއިންއާ ދެކޮޅަށް މަސައްކަތް ކުރާ ކަމަށް ފާހަގަ ކުރެވިފައިވާ ކަމަށެވެ.
މިސްޓޭޓްގެ ޕަބްލިކް ހެލްތު އޮފިޝަލުން ވިދާޅުވާ ގޮތުގައި، އިތުރަށް ފެންނަމުންދާ ކޭސްތަކަކީ މިސްޓެއިންއާ ގުޅުން ހުރި ކޭސްތަކެއްތޯ ނުވަތަ ނޫންތޯ ޔަގީން ކުރުމަށްޓަކާ މިހާރުދަނީ ކޮންޓެކްޓް ޓްރޭސިން ހަދަމުންނެވެ.
ދުނިޔޭގެ އެކިކަންކޮޅުތަކުގައި މިހާރު ފެތުރެރެމުންދާ ކޯވިޑް19ގެ މި އާސްޓެރެއިންއާ ގުޅޭ ހުރިހާ ތަފްސީލުތަކެއް މިހާތަނަށް އަދި ލިބެން ނެތްކަމުގައިވި ނަމަވެސް، މި ވޭރިއަންޓަކީ، ގައިން ގަޔަށް ވާސިލްވުމުގެ ގާބިލްކަން ކުރީގެ ވޭރިއަންޓްތަކަށްވުރެ މާ ބޮޑަށް ލިބިފައިވާ ސްޓްރެއިންއެއް ކަމުގެ އިންޒާރު އިގިރޭސިވިލާތުގެ ސައިންސްވެރިން ވަނީ ދީފައެވެ.
"އަހަރުމެންގެ އެންމު މުހިންމު ކަމަކީ ކޮލެރާޑޯގެ ރައްޔިތުންގެ ސިއްޙަތު، އެހެނަކަމަމުން، އަލަށް މިފެނުނު ކޭސްވެސް އަހަރެމެން ވަރަށް ރަގަޅަށް މޮނިޓަރ ކުރަމުން ދާނަން، އަދި ކޯވިޑް19ގެ ހުރިހާ ކޭސްތަކެއްވެސް އަހަރެމެން ދާނީ މޮނިޓަރ ކުރަމުން،" ކޮލެރާޑޯގެ ގަވަރުނަރު ޕޯލިސް ވިދާޅުވިއެވެ.
ގަވަރުނަރު ޕޯލިސްއާއި އަދި ސިޓީގެ ހެލްތު އޮފިޝަލުންނާ އެކީ މިއަދު ޚާއްސަ ޕްރެސް ކޮންފަރެންސެއް ބޭއްވުމަށް ވަނީ ހަމަޖެހިފައެވެ.
އެމެރިކާއިންވެސް އާ ސްޓްރެއިން ފެނިގެން ދިއުމާގުޅިގެން އެގައުމުގެ ސެންޓަރ ފޯރ ޑިސީސް ކޮންޓްރޯލް އިން މިހާރުވަނީ، ކްރިސްމަސް ބަންދުގައި އިގިރޭސިވިލާތުން އެމެރިކާއަށް ދަތުރުކުރާ ދަތުރުވެރިންނަށް ނެގެޓިވް ކޯވިޑް ޓެސްޓަކާ ނުލާ އެގައުމަށް އެތެރެ ނުވެވޭގޮތަށް ނިންމާ އާގައިޑްލްތަކެއް އާންމު ކޮށްފައެވެ.
އިގިރޭސިވިލާތުން ފެނުން ކޯވިޑް19ގެ މުޅިން އާވައްތަރުތަކާ ގުޅޭގޮތުން އުފެދިފައިވާ ކަންބޮޑުވުންތައް އިތުރަށް ބޮޑުވެގެން ދިޔައީ، އިގިރޭސިވިލާތުގައި މި ސްޓްރެއިން ބާރަށް ފެތުރެމުންދާ ކަމަށާއި އަދި މިއީ ކުރީގެ ސްޓްރެއިންތަކަށްވުރެ ވެސް މާ ފަސޭހައިން ގައިންގަޔަށް ވާސިވުމުގެ ގާބިލްކަން ލިބިފައިވަ ސްޓްރެއިންއެއްކަން، އިގިރޭސި ބޮޑުވަޒީރު ބޮރިސް ޖޯންސަން އިއުލާން ކުރެއްވި ހިސާބުންނެވެ. އެންމު ފުރަތަމަ ފަހަރަށް އިގިރޭސިވިލާތުން ކޯވިޑް19ގެ އާ ސްޓްރެއިން ފެނިގެން ދިޔައީ، އެގައުމުގެ އިރުދެކުނު ސަރަހައްދަކުންނެވެ.
މިހާތަނަށް އައިއިރު ދުނިޔޭގެ އެތަކެއް ގައުމުތަކުން ވަނީ އިގިރޭސިވިލާތަށް ދަތުރުކުރުން ހުއްޓާލާފައެވެ. އަދި އެންމެ ފުރަތަމަ މި ސްޓްރެއިން ފެނުނު، އެގައުމުގެ އިރުދެކުނު ސަރައްދުވަނީ ލޮކްޑައުން ކޮށްފައެވެ. ސައިންސްވެރިން އަލަށް ފެންނަމުން މިދާ ސްޓްރެއިންތަކާ ގުޅޭގޮތުން މިހާތަނަށް ބުނެފައިވަނީ، ކަންބޮޑުވުންތައް އެބަހުރި ކަމަށާއި އެހެންނަމަވެސް، އާދާޔާ ޚިލާފަށް ހާސްވާންޖެހޭވަރުގެ ކަންބޮޑުވުންތައް އަދި ފެންނަމުން ނުދާކަމަށެވެ.
ކޮރޯނާ ވައިރަހުގެ އާސްޓެރެއިންތައް ވަނީ، މީގެ އަހަރެއް ކުރިން ޗައިނާއިން މިވައިރަސް އެންމެ ފުރަތަމަ ފެނުނު ހިސާބުންވެސް، ފެންނަމުން ގޮސްފައެވެ. ވައިރަހެއް، އާންމު އާބާދީއެއްގެ ތެރެއިން ނަކަލް ވަމުންދާއިރު، އެއަށް ކުދިކުދި ބަދަލްތައް އަންނަމުން ދިއުމަކީ އާންމު ކަމެކެވެ. ގައިންގަޔަށް ވައިރަސް ވާސިލްވަމުންދާއިރު، އޭގެ ޑީއެންއޭ އެތުރިފައިވާގޮތަށް އަންނަ މި ބަދަލުތަކަށް ކިޔަނީ ވައިރަސް މިއުޓޭޓްވަމުން ދިއުމެވެ. މިއުޓޭޓް ވުމުން އުފެދޭ އާވައްތަރު ފާހަގަ ވެގެން ދަނީ ވައިރަހުގެ އާ ސްޓްރެއިންގެ ގޮތުގައެވެ.
މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ސްޓްރެއިންތަކުގެ، ފެންނަމުންދާ ބަދަލުތަކަކީ ކުދިކުދި ބަދަލްތަކެއް ކަމުގައިވި ނަމަވެސް، އާދަޔާ ޚިލާފަށް ބޮޑަށް މިއުޓޭޓްވެފައިވާ އާ ސްޓްރެއިން ފެނިއްޖެނަމަ، އަތައް މަސައްކަތަކުން އީޖާދުކޮށް، މިހާރު ބޭނުން ކުރަމުންދާ ވެކްސިންތައް އާސްޓްރެއިންތަކާ ދެކޮޅަށް މަސައްކަތް ނުކުރުމުގެ ކަންބޮޑުވުން ސައިންސްވެރިންގެ މެދުގައި މިހާރުވެސް އިންތިހާއަށް އެބައޮތެވެ.
