ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި، ސަރުކާރުން ކައުންސިލް އިމާރާތްތައް އަޅަން ނިންމާފައިވާ ރަށްތަކުގެ މައުލޫމާތު ހާމަކުރައްވައިފި އެވެ. މި މަޝްރޫއުގެ ދަށުން ދެ ގޮތަކަށް ކައުންސިލް އިމާރާތްތައް އެޅުމަށް ވަނީ ނިންމާފައެވެ.
އޭގެ ތެރެއިން 55 ރަށެއްގައި ކައުންސިލް އިމާރާތްތައް އަޅާނީ ހެކްސްޓާ މޯލްޑިވްސްއާ ހަވާލުކޮށްގެން ކޮންޓްރެކްޓާ ފައިނޭންސް އުސޫލުންނެވެ. އިއްޔެ ސޮއިކުރެވުނު މި އެއްބަސްވުމުގެ ދަށުން، ހެކްސްޓާއިން އިމާރާތްތައް އަޅައި، ފަރުނީޗަރު ހަމަކޮށް، ކައުންސިލްތައް ހުޅުވާތާ ތިން މަސް ފަހުން ސަރުކާރުން ފައިސާ ދައްކަން ފަށާނެ ކަމަށް މިނިސްޓަރު ވިދާޅުވި އެވެ.
އަނެއް ބައި ކަމުގައިވާ 50 ރަށެއްގައި ކައުންސިލް އިމާރާތްތައް އަޅާނީ ޗައިނާ ސަރުކާރުގެ އެހީގެ ދަށުންނެވެ. ނަމަވެސް "އަދަދު" އިން ހުށަހެޅި އާރުޓީއައި އަކަށް ދިން ޖަވާބުގައި ކައުންސިލް މިނިސްޓްރީން މައުލޫމާތު ދެއްވާފައިވާ ގޮތުގައި، މި މަޝްރޫއުގެ އޮފީސްތަކުގެ ޑިޒައިން އަދި ވަނީ ނުނިމެއެވެ. އަދި މަޝްރޫއު ބީލަމަށް ހުޅުވާލުމާއި މަސައްކަތް ފެށުމުގެ ތާރީހެއްވެސް އަދި ވަނީ ކަނޑަނޭޅި އެވެ.
ކުރިން ސަރުކާރުން ވިދާޅުވެފައިވަނީ ކައުންސިލް އިމާރާތްތައް އަޅާނެ ރަށްތައް ހޮވުމުގައި އާންމުންގެ ހިޔާލު ހޯދާނެ ކަމަށެވެ. އެހެން ނަމަވެސް މިއަދު މި ރަށްތައް އިއުލާނު ކުރެވުނު އިރު، އާންމުންގެ ހިޔާލު ހޯދާފައި ނުވާކަން ފާހަގަކުރެވެ އެވެ.
